बाजुरामा जिप दुर्घटना हुँदा दुई जनाको मृत्यु, सात जना घाइते

बाजुरामा जिप दुर्घटना हुँदा दुई जनाको मृत्यु, सात जना घाइते

बाजुरा – बाजुराको हिमाली गाउँपालिका–५ क्युडीस्थित कुवाडी–क्युडी भित्री कच्ची सडकमा जिप दुर्घटना हुँदा दुई जनाको मृत्यु भएको छ भने सात जना घाइते भएका छन्।

प्रहरीका अनुसार धुलाचौरबाट दुधिला खोलातर्फ जाँदै गरेको सु.प.प्र.०१–००१ ज १४७८ नम्बरको जिप सडकबाट करिब १० मिटर तल खस्दा दुर्घटना भएको हो।

दुर्घटनामा गम्भीर घाइते भएका हिमाली गाउँपालिका–२ निवासी ४० वर्षीय धर्मलाल बुढा र हुम्लाको ताजाकोट गाउँपालिका–५ निवासी करिब ४० वर्षीय अम्मर सिंह बुढाको उपचारका क्रममा कोल्टी आधारभूत अस्पताल, बाजुरामा मृत्यु भएको प्रहरीले जनाएको छ।

दुर्घटनामा जिप चालक २५ वर्षीय जनवीर बुढा र ३१ वर्षीया मिजरा बुढा मध्यम घाइते भएका छन्। त्यसैगरी अस्मिता थापा, जंग सिंह बुढा, गोरख रोकाया, लोकेन्द्र बुढा तथा ९ वर्षीया सुस्मा बुढा सामान्य घाइते भएका छन्।

घटनालगत्तै अस्थायी प्रहरी पोस्ट कुवाडी र इलाका प्रहरी कार्यालय बुढीनन्दाबाट प्रहरी टोली खटिएको थियो। सबै घाइतेलाई उपचारका लागि कोल्टी आधारभूत अस्पताल पुर्‍याइएको प्रहरीले जनाएको छ।

प्रहरीले दुर्घटनाको कारणबारे थप अनुसन्धान भइरहेको जनाएको छ।