तीन दिनसम्म हावाहुरी र चट्याङसहित वर्षा हुन सक्ने : सतर्कता अपनाउन आग्रह

देशका केही भागमा मेघ गर्जन र चट्याङसहित वर्षा गराउने बादल विकसित भइरहेकोले सतर्कता अपनाउन जल तथा मौसम पूर्वानुमान महाशाखाले आग्रह गरेको छ।

सुदूरपश्चिम, कर्णालीका अधिकांश भूभागमा, प्रदेश ५ र गण्डकी प्रदेश तथा बागमती प्रदेशका केही स्थानमा यस्तो बादल विकसित भइरहेको महाशाखाले जनाएको छ। महाशाखाका अनुसार उक्त प्रणाली पूर्वतर्फ सर्दैछ।

हाल देशमा पश्चिमी वायुको सामान्य प्रभाव रहेको र स्थानीय वायु तथा पूर्वी भूभाग नजिक बनेको न्यून चापिय क्षेत्रको प्रभाव हुनुको साथै बंगालको खाडी र अरब सागरबाट समेत जलवाष्पयुक्त वायु नेपालमा प्रवेश गरिरहेको छ। पश्चिमी भूभागका केहि स्थानहरुमा मेघ गर्जन र चट्याङसहित वर्षा भइरहेको महाशाखाले जनाएको छ।

आगामी तीन दिनको मौसम पूर्वानुमान

वैशाख २२ गते सोमबार

देशको अधिकांश भूभागमा सामान्यदेखि पूर्ण बदली रहनेछ। देशका केही स्थानहरूमा मेघ गर्जन, चट्याङ, असिना र हावाहुरीसहित वर्षाको सम्भावना रहेको छ।

वैशाख २३ गते मंगलबार

देशको अधिकांश भूभागमा सामान्यदेखि पूर्ण बदली रहनेछ। देशको पश्चिमी भूभागका धरै स्थानहरूमा साथै मध्य तथा पुर्वका केही स्थानहरुमा मेघ गर्जन, चट्याङ र असिनासहित वर्षाको सम्भावना रहेको छ।

वैशाख २४ गते बुधबार

देशभर आंशिकदेखि सामान्य बदली रहनेछ।देशको पहाडी भूभागका केहि स्थानहरूका साथै पूर्वी र मध्य तराईका एकदुई स्थानमा मेघ गर्जन र चट्याङसहित वर्षाको सम्भावना रहेको छ।