डोटीमा भारतबाट आएका २८७९ जना क्वारेण्टाइनमा : व्यवस्थापनमा समस्या

डोटी- जिल्लाका विभिन्न स्थानीय तहहरुमा दुई हजार आठ सय ७९ जनालाई क्वारेण्टाइनमा राखिएको छ । रोजगारीको सिलसिलमा भारतका विभिन्न ठाउँहरुमा कार्यरत मजदुरहरु गृह जिल्ला फर्केपछि उनिहरुलाई क्वारेण्टाइनमा राखिएको हो ।

जिल्ला प्रहरी कार्यालयका अनुसार जेठ ९ गतेदेखि मंगलबार (आज) सम्म भारतबाट आएका दुई हजार आठ सय ७९ जनालाई क्वारेण्टाइनमा राखिएको छ । भारतमा कोरोना भाइरसका कारण जारी लकडाउनका कारण व्यरोजगार बनेका समस्यामा परेका व्यक्तिहरु अझै आउनेक्रम जारी रहेको छ । सोमबारदेखि कञ्चनपुरको गड्डाचौकी नाकासमेत खुलेका कारण अझै हजारौंको संख्यामा जिल्ला भित्रिने प्रहरी निरीक्षक कर्णबहादुर बोहराले बताए ।

भारतबाट घर फर्कनेको संख्या बढ्दै गएपछि क्वारेन्टाइन व्यवस्थापनमा समस्या हुने स्थानीय जनप्रतिनिधि बताउँछन् । जिल्लामा क्वारेन्टाइनको संख्या बढ्दै जाँदा सुरक्षाको समेत समस्या भइरहेको प्रहरीले जनाएको छ । मंगलबारसम्म जिल्लामा करिब ७५ वटा क्वारेन्टाइनमा भारतबाट फर्केकालाई राखिएको छ । जिल्लाका सामुदायक विद्यालयका भवनलाई सबै क्वारेन्टाइन बनाइएको छ ।

सबैभन्दा बढी शिखर नगरपालिकामा ६ सय ३३ जना भारतबाट घर फर्किएका छन् भने दिपायल सिलगढी नगरपालिकामा पाँच सय ६६ जना रहेका छन् । त्यसैगरी केआइसिंह गाउँपालिकामा पाँच सय १४ जना, आदर्श गाउँपालिकामा दुई सय ८५ जना, सायल गाउँपालिकामा दुई सय ५९ जना, बोगटान फुड्सिल गाउँपालिकामा दुई सय १४ जना भारतबाट घर फर्केका छन् ।

बडीकेदार गाउँपालिकामा दुई सय ४२ जना, जोरायल गाउँपालिकामा ६३ जना तथा पूर्वीचौकी गाउँपालिकामा एक सय ३ जना घर फर्किएका छन् । उनिहरु सबैलाई क्वारेन्टाइनमा राखिएको छ ।

क्वारेन्टाइनमा सुरक्षा व्यवस्था कमजोर देखिएको छ । क्वारेन्टाइन सञ्चालन तथा व्यवस्थापन मापदण्ड अनुसार क्वारेन्टाइन स्थलमा स्वास्थ्य उपकरणसहित सुरक्षाकर्मीको अलग्गै टोलीको व्यवस्था गरिनुपर्ने भएपनि जिल्लामानै सुरक्षाकर्मी अभावका कारण एउटा क्वारेन्टाइनमा हतियारबिनाका एकजना मात्र प्रहरी खटिएको छ ।

जिल्लामा प्रहरीको जम्मा दरबन्दीको आधा मात्रै प्रहरी रहेकाले सबै क्वारेन्टाइनमा पर्याप्त संख्यामा खटाउन नसकेको जनाइएको छ । जिल्ला प्रहरी कार्यालयका सूचना अधिकारी प्रहरी निरीक्षक कर्णबहादुर बोहराले भने, ’धेरै संख्यामा मान्छे रहेको कुनै क्वारेन्टाइनमा दुईजना प्रहरी खटाइएको छ भने अधिकांशमा एकजना मात्रै छन् ।’

क्वारेन्टाइनमा सुरक्षा व्यवस्था कमजोर भएका कारण क्वारेन्टाइनमा बसेका व्यक्तिका आफन्तको आवतजावत बाक्लो देखिन्छ । आफन्त आउने र नजिकैबाट भेटघाट गर्ने हुँदा क्वारेन्टाइनमा कोरोना जोखिम बढेको छ ।

क्वारेन्टाइन व्यवस्थित नहुँदा कतिपय व्यक्ति क्वारेन्टाइनमा बस्न नमानेको जनप्रतिनिधि बताउँछन्। क्वारेन्टाइनको सुरक्षा व्यवस्था कमजोर देखिएपछि जिल्लामा रहेका स्थानीय तहले क्वारेन्टाइनको सुरक्षार्थ स्थानीय स्वायंसेवक परिचालित गर्नुपर्ने निर्णय समेत गरेको छ ।

सोमबार बसेको संकट व्यवस्थापन केन्द्रको बैठकले प्रत्येक पालिकाले पालिकास्तरिय स्वयंसेवक समूह गठन गर्ने निर्णय गरेको प्रमुख जिल्ला अधिकारी टेकनारायण पौडेलले बताए । प्रजिअ पौडेलका अनुसार सडक पहुँच भएका क्वारेन्टाइनमा सशस्त्र प्रहरीको मोबाइल टोलीले गस्ती गरिरहेको छ ।

एकै पटक ठूलो संख्यामा गाउँ(गाउँमा भारतबाट आएका व्यक्ति देखेपछि स्थानीय त्रसित भएका छन्।उनीहरुबाट कोरोना भाइरस संक्रमण हुने डरले स्थानीय त्रसित बनेका हुन् । बस्ती नजिकैका सामुदायिक विद्यालयमा बनाइएका क्वारेन्टाइनबाटै कोरोना भाइरस फैलिने हो की भन्ने आशंका स्थानीयमा देखिन्छ ।

सीमा नाकामा चेकजाँच बिनानै जिल्ला पसेकाले डोटी कारोना भाइरसको उच्च जोखिममा रहेको स्थानीय बताउँछन् । भारतबाट हजारौको संख्यामा जिल्ला आएकाहरुको स्वास्थ्य परीक्षण गर्नुपर्ने माग उठिरहेका बेला जिल्लामा भने किट अभाव छ। अहिले जिल्लामा भिटिएम नरहेको र आरडीटी एक सय ९६ वटा मात्र रहेको जिल्ला स्वास्थ्य कार्यालयले जनाएको छ ।

आवश्यक किट माग गरिएको जिल्ला स्वास्थ्य कार्यालयका कोरोना फोकल पर्सन सूर्य बिष्टले जानकारी दिए। बिष्टले भने, ’हामीले प्रदेश सरकारसँग पाँच हजार आरडीटी र तीन हजार भिटिएम माग गरेका छौं, माग गरिएअनुसारको सामग्री आइपुग्यो भने परीक्षण सुरु हुन्छ ।’