सम विकास केन्द्र डोटीद्वारा शिखर नगरपालिकालाई स्वास्थ्य सामग्री सहयोग

योगेन्द्र बलायर, डोटी

सम विकास केन्द्र डोटीले शिखर नगरपालिका डोटीलाई स्वास्थ्य सामग्री तथा उपकरण प्रदान गरेको छ । डिसिएको आर्थिक सहयोगमा संस्थाले शिखर नगरपालिकाको वाडा नं १ कपल्लेकी स्वास्थ्य चौकी, वडा नं २ मुडेगाउँ स्वास्थ्य चौकी र वडा नं ४ मुडभरा स्वास्थ्य चौकीलाइ उपलव्ध हुने गरि सामग्री हस्तान्तरण गरिएको हो ।

सम विकास केन्द्र डोटीको कार्यक्षेत्र भित्र पर्ने वडाका स्वास्थ्य चौकीहरुलाई उपलब्ध हुनेगरी ३ लाख ३४ हजार १ सय ६८ रुपैया बराबरको स्वास्थय सामग्री सहयोग गरिएको संस्थाका कार्यक्रम संयोजक महेश परियारले बताए ।

संस्थाले नगरपालिकालाई ६ थान पिपिइ, ६ थान थर्मल गन, ८४ थान सेनेटाइजर, २ हजार ५ सय थान सर्जिकल मास्क, २ हजार ५ सय थान साबुन लगायतका सामग्री उपलब्ध गराएको हो ।

सामग्री हस्तान्तरण क्रममा वोल्दै सिखर नगरपालिका डोटीका नगर प्रमुख सिताराम जोशीले सम विकास केन्द्र डोटीले उपलब्ध गराएको स्वास्थ्य सामग्रीले नोवेल कोरोना भाइरस विरुद्धको अभियामना सहयोग पुग्ने बताए ।

समविकास केन्द्र डोटीले हस्तान्तरण गरेको स्वास्थ्य सामग्री आइतवार नै सम्बन्धित वडालाइ हस्तान्तरण गरिएको नगरपालिकाका स्वास्थ्य संयोजक हरिश शाहले बताए ।

सम विकास केन्द्र डोटीले कार्यक्रम क्षेत्र रहेका के.आइ. सिंह गाउँपालिका र जोरायल गाउँपालिकालाई समेत स्वास्थ्य सामग्री वितरण गरेको छ ।