स्थानीय तह निर्वाचन २०७९

डोटीमा पाँच जना वडा अध्यक्ष प्यानल सहित निर्वाचित

दिपायल– डोटी जिल्लाका बिभिन्न गाउँपालिकाका चार वटा वडाहरुको अन्तिम मत परीणाम सार्वजनिक भएको छ । प्राप्त मत परिणाम अनुसार विभिन्न तीनवटा वडामा नेकपा (एमाले) र दुई वडामा नेपाली काँग्रेसका उम्मेदवार निर्वाचित भएका छन् ।

मुख्य निर्वाचन कार्यालय डोटीका अनुसार आदर्श गाउँपालिका ७ मा नेपाली कांगै्रसका उमेदवार लाल बहादुर विष्ट, बडीकेदार गाउँपालिका ३ मा कांग्रेसकै उमेदवार राम बहादुर गुरुङ्ग विजयी भएका हुन् । त्यस्तै, बोगटान फुड्सिल गाउँपालिका–१ मा नेकपा (एमाले) का उमेदवार खेमबहादुर घर्तीमगर, जोरायल गाउँपालिका–१ मा एमालेकै उमेदवार जगतबहादुर मल्ल विजयी भएका छन् । बडीकेदार गाउँपालिका–५ मा एमाले उमेदवार पदम सिंह बोहरा विजयी भएका छन् । सबै वडा अध्यक्षहरु प्यानल सहित विजयी भएका हुन् ।

नौ स्थानीय तह रहेको डोटी जिल्लामा बिभिन्न राजनितिक दल र स्वतन्त्र गरेर प्रमुख पदमा ३६ जना र उपप्रमुख पदमा २९ जना चुनावी मैदानमा छन् । जिल्लाका आदर्श, बोगटान फुड्सिल, बडीकेदार, जोरायल र पूर्वीचौकी गाउँपालिकामा मतगणना भइरहेको छ ।

प्राभारम्भिक मत परिणाम अनुसार डोटीको पूर्वीचौकी, बडीकेदार र आदर्श गाउँपालिकामा नेपाली काँग्रेसको अग्रता रहेको छ । जोरायल गाउँपालिकामा नेपाल कम्युनिष्ट पार्टी (एमाले) र बोगटान फुड्सिल गाउँपालिकामा नेपाल कम्युनिष्ट पार्टी (माओवादी केन्द्रको) अग्रता रहेको छ ।