कोरोना संक्रमणबाट ८ महिनामा ८ लाखको मृत्यु

काठमाडौं– करिब ८ महिनाअघि चीनको वुहान सहरबाट सुरु भएको कोरोना भाइरसले पूरै विश्वलाई आक्रान्त पारेको छ।

२ करोड ३० लाखभन्दा बढी मानिस कोरोनाबाट संक्रमित भइसकेका छन् भने मृत्यु हुनेको संख्या ८ लाख नाघेको छ।

विश्वभर करिब ६२ हजार संक्रमितको स्वास्थ्य अवस्था गम्भीर छ। ६५ लाख ४३ हजारको स्वास्थ्य अवस्था मध्यम छ। १ करोड ५६ लाख भने संक्रमणमुक्त भएका छन्। एक्टिभ केसको संख्या ६६ लाख छ।

कोरोनाबाट सबैभन्दा बढी प्रभावित अमेरिकामा मृतकको संख्या १ लाख ८० हजार पुग्न लागेको छ। त्यहाँ झन्डै ५९ लाख संक्रमित भएकोमा ३१ लाख भने संक्रमणमुक्त भएका छन्। अमेरिकामा दैनिक करिब ५० हजार संक्रमित थपिइरहेका छन् भने दिनमा झन्डै १ हजार जनाको ज्यान गइरहेको छ।

दोस्रो प्रभावित देश ब्राजिलमा ३५ लाख ३६ हजार संक्रमित हुँदा १ लाख १३ हजारभन्दा बढीको ज्यान गएको छ। त्यहाँ पनि दैनिक हजारौं थपिइरहेका छन् भने सयौंको मृत्यु भइरहेको छ।

तेस्रो नम्बरमा आउँछ छिमेकी देश भारत। भारतमा पनि दैनिक संक्रमण र मृत्यु दुवै बढ्दो छ। भारतमा संक्रमितको संख्या ३० लाख पुग्दै गर्दा मृत्यु हुनेको संख्या करिब ५६ हजार छ।

दैनिक ९ लाखको हाराहारीमा पीसीआर टेस्ट हुँदा भारतमा ५० हजारभन्दा बढी संक्रमित थपिन्छन्। दैनिक १ हजारको हाराहारीमा मृत्यु भइरहेको छ।

नेपालमा ५ लाख ७९ हजार ८९९ जनाको पीसीआर परीक्षण गर्दा ३० हजार ४८३ जनामा संक्रमण पाइएको छ।

यीमध्ये १३७ जनाको मृत्यु भएको छ भने १८ हजार २१४ जना संक्रमणमुक्त भएका छन्। सक्रिय संक्रमितको संख्या १२ हजार १३२ छ।
तथ्यांक स्रोत : वर्ल्डओमिटर