२०८३ भाद्र १७, बुधबार
September 2, 2026, Wednesday
शिखर समाचार
धनगढी – सुदूरपश्चिमसहित देशभर मनसुनी प्रणाली सक्रिय रहेकाले विभिन्न क्षेत्रमा वर्षा जारी रहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार हाल मनसुनी वायुको प्रभाव कायम रहेको छ भने मनसुनको न्यून चापीय रेखा नेपालको पश्चिम भू–भागमा सरदरभन्दा उत्तरतर्फ र पूर्वी भू–भागमा सरदर स्थानको आसपास रहेको छ।
हाल सुदूरपश्चिम, कर्णाली, गण्डकी, लुम्बिनी, बागमती र कोशी प्रदेशका थोरै स्थानमा हल्कादेखि मध्यम वर्षा भइरहेको विभागले जनाएको छ।
आज दिउँसो सुदूरपश्चिम प्रदेशका पहाडी तथा हिमाली भू–भागमा सामान्यदेखि पूर्ण बदली रहनेछ भने तराई क्षेत्रमा पनि सामान्य बदली रहने पूर्वानुमान गरिएको छ।
प्रदेशका एक–दुई स्थानमा मेघगर्जन तथा चट्याङसहित मध्यम वर्षा हुन सक्ने सम्भावना रहेको विभागले जनाएको छ।
देशका अन्य प्रदेशमध्ये गण्डकी, लुम्बिनी र कर्णालीका पहाडी क्षेत्रमा भारी वर्षाको सम्भावना रहेको छ।
आज राति पनि सुदूरपश्चिमका पहाडी तथा हिमाली क्षेत्रमा मेघगर्जन र चट्याङसहित मध्यम वर्षा हुने सम्भावना रहेको विभागको पूर्वानुमान छ।
यस्तै, सुदूरपश्चिमका तराई क्षेत्रका एक–दुई स्थानमा पनि मेघगर्जनसहित मध्यम वर्षा हुन सक्ने जनाइएको छ।
जल तथा मौसम विज्ञान विभागले वर्षाका कारण गेग्रान बहाव, बाढी, पहिरो, डुबान तथा भू–क्षय हुने जोखिम रहेकाले विशेष सावधानी अपनाउन आग्रह गरेको छ।
विशेषगरी सुदूरपश्चिमका नदी तथा खोलानालाको आसपास, पहिरोको जोखिम भएका सडक र पहाडी बस्तीमा बसोबास गर्ने नागरिकलाई सतर्क रहन विभागले अनुरोध गरेको छ।
विभागले सम्भावित विपद्का कारण दैनिक जनजीवन, कृषि, स्वास्थ्य सेवा, पर्यटन, पर्वतारोहण, सडक तथा हवाई यातायातमा समेत असर पर्न सक्ने भएकाले यात्रा गर्नुअघि मौसमको पछिल्लो जानकारी लिन र आधिकारिक सूचनामा अद्यावधिक रहन सबैलाई आग्रह गरेको छ।
दिपायल – रसुवाको भोटेकोशी हुँदै त्रिशूली नदीमा आएको भीषण...
