कर्णालीको झोलुंगे पुल आन्तरिक पर्यटकको नयाँ आकर्षण, कैलाली–बर्दियाको दूरी पनि छोटियो

कर्णालीको झोलुंगे पुल आन्तरिक पर्यटकको नयाँ आकर्षण, कैलाली–बर्दियाको दूरी पनि छोटियो

दौलतपुरस्थित कर्णाली नदीमा झोलुंगे पुल सञ्चालनमा आएपछि पर्यटकको चहलपहल बढ्यो, स्थानीयले पर्यटन र व्यापार प्रवर्द्धन हुने अपेक्षा

भजनी (कैलाली) |

कैलालीको टीकापुर नगरपालिका र बर्दियाको राजापुर नगरपालिका जोड्ने दौलतपुरस्थित कर्णाली नदीमाथिको झोलुंगे पुल सञ्चालनमा आएपछि उक्त क्षेत्र आन्तरिक पर्यटकको नयाँ गन्तव्यका रूपमा विकास हुन थालेको छ।

हालै निर्माण सम्पन्न भएर सर्वसाधारणका लागि सञ्चालनमा आएको पुल अवलोकन गर्न तथा कर्णाली नदीको प्राकृतिक सौन्दर्य नियाल्न दैनिक आन्तरिक पर्यटकको उल्लेख्य भीड लाग्न थालेको छ। विशेषगरी गर्मी छल्न साँझपख पुल क्षेत्रमा घुम्न आउनेको संख्या बढ्दो छ।

टीकापुर–५ का स्थानीय किरण चौधरीले पुल सञ्चालनमा आएपछि अपेक्षाभन्दा धेरै आगन्तुक आउने गरेको बताए। उनका अनुसार कर्णाली नदी, हरियाली वातावरण र खुला दृश्यले पर्यटकलाई आकर्षित गरिरहेको छ।

यात्रा सहज, दूरी २४ किलोमिटरबाट १५ किलोमिटरमा झर्‍यो

झोलुंगे पुल सञ्चालनमा आएपछि कैलालीको टीकापुर र बर्दियाको राजापुरबीचको दूरी करिब २४ किलोमिटरबाट १५ किलोमिटरमा सीमित भएको छ। साथै, विगतमा डुङ्गामार्फत जोखिमपूर्ण यात्रा गर्नुपर्ने बाध्यता पनि हटेको छ।

स्थानीय प्रेमप्रसाद भण्डारीका अनुसार पुलले दुई जिल्लाबीचको आवागमन सहज बनाउनुका साथै पर्यटन प्रवर्द्धनमा महत्वपूर्ण योगदान पुग्ने अपेक्षा गरिएको छ। पुल नजिकै रहेको टीकापुर पार्कमा समेत पर्यटकको संख्या बढ्ने विश्वास स्थानीयको छ।

एक वर्षमै सम्पन्न भयो निर्माण

निर्माण कम्पनी थानी निर्माण सेवाले निर्धारित समयभन्दा अगावै पुल निर्माण सम्पन्न गरेको जनाएको छ। कम्पनीका प्रबन्धक विक्रम बस्नेतका अनुसार पुलको निर्माण सम्पन्न भई आवागमन सुरु भइसकेको छ भने अब सम्बन्धित निकायलाई हस्तान्तरण गर्ने तयारी भइरहेको छ।

करिब रु. १५ करोड ७३ लाख ९५ हजार ५२८ लागतमा निर्माण गरिएको उक्त झोलुंगे पुलको लम्बाइ ४८२ मिटर रहेको कम्पनीले जनाएको छ।

स्थानीय अर्थतन्त्रमा सकारात्मक प्रभाव पर्ने अपेक्षा

स्थानीय सुन्दरलाल थारुले पुलले आवागमन सहज बनाउनुका साथै कर्णाली क्षेत्रलाई पर्यटनको नयाँ केन्द्रका रूपमा स्थापित गर्न सक्ने बताए। यसबाट होटल, रेष्टुरेन्ट, स्थानीय व्यापार तथा अन्य आर्थिक गतिविधिमा समेत सकारात्मक प्रभाव पर्ने अपेक्षा गरिएको छ।

यसैबीच, टीकापुर नगरपालिका हुँदै बर्दियाको गेरुवा गाउँपालिका जोड्ने सन्कट्टीस्थित कर्णाली नदीमाथिको पक्की पुल पनि निर्माण सम्पन्न भएर सञ्चालनमा आइसकेको छ, जसले यस क्षेत्रको यातायात तथा पर्यटन पूर्वाधारलाई थप मजबुत बनाएको छ।