झुलाघाट नाकाबाट निर्यात शून्य, आयातबाट राजस्व भने बढ्यो

बैतडी– सुदूरपश्चिम प्रदेशको पहाडी जिल्ला बैतडीको मुख्य नाका महाकाली भन्सार कार्यालय झुलाघाटमा गत वर्षको निर्यात शून्यमा झरेको छ । नाकाबाट गत वर्ष कुनै पनि सामान निकासी नभएको भन्सार कार्यालयले जनाएको छ ।

कार्यालयका प्रमुख अनिल झाका अनुसार केही वर्ष अघिसम्म घ्यू निर्यात हुने गरेको थियो । निर्यात शून्यमा झरे पनि कार्यालयले लक्ष्यभन्दा बढी राजस्व सङ्कलन गरेको छ । आयातबाट भने लक्ष्यभन्दा एक सय ७० प्रतिशत बढी राजस्व सङ्कलन भएको उनले बताए ।

कार्यालयले गत आवमा ५१ लाखको लक्ष्य राखेकामा ८६ लाख ८४ हजार ९० रुपैयाँ राजस्व सङ्कलन गरेको प्रमुख झाले बताए । उनका अनुसार लक्ष्यभन्दा ३५ लाख ८४ हजार ९० बढी राजस्व सङ्कलन भएको हो । भन्सार महसुल, भन्सार सेवा दस्तुर, मूल्य अभिवृद्धि कर र अन्त शुल्कबाट उक्त राजस्व रकम सङ्कलन गरिएको कार्यालयले जनाएको छ ।

विगतका वर्षमा लक्ष्य अनुसार राजस्व सङ्कलन गर्न नसक्ने अवस्था थियो । आव २०७९/८० मा ३८ लाख राजस्व सङ्कलन गर्ने लक्ष्य लिइएकामा ३५ लाख ३८ हजार मात्रै सङ्कलन भएको थियो ।

भन्सार क्षेत्रमा गरिएको कडाइ, आयातमा वृद्धिलगायत कारणले लक्ष्यभन्दा बढी राजस्व सङ्कलन भएको भन्सार प्रमुख प्रमुख झाले बताए । यो नाकाबाट चिनी, कपडा, गुड, भाँडाकुडालगायत घरायसी प्रयोजनका सामग्री बढी भित्रिने गर्दछन् । झुलाघाट नाकामा मोटरेबल पुल नहुँदा व्यापारीले धेरैजसो सामान धनगढी तथा काठमाडौंबाट ल्याउने गरेका छन् ।