सुदूरपश्चिमका ११९ जना कोरोना संक्रमित अस्पतालमा : ३८२ जना क्वारेन्टिन र घरमा

सुदूरपश्चिम प्रदेशमा बिहिवार मात्रै दुई सय ३८ जनामा कोरोना पुष्टि भएपछि संक्रमितको सङख्या छ सय १७ पुगेको छ। अहिलेसम्म सबैभन्दा बढि कैलालीमा एक सय ४९ जना, डडेल्धुरामा एक सय २३, कञ्चनपुरमा ९५, अछामका ६७, बाजुराका ६२, बैतडीमा ५२, डोटीका ४२, बझाङमा १६ र दार्चुलामा १२ जनामा कोरोना पुष्टि भएको छ।

पुष्टि भएका पाँच जनाको मृत्यु भईसकेको छ भने एक सय ११ जना घर फर्किसकेका छन्। घर फर्किसकेका एक सय ११ जनामध्ये सबैमा कोरोना निको भने हुन सकेको छैन्। उनीहरुलाई कोरोनाको कुनै पनि लक्षण नदेखिएको भन्दै विभिन्न अस्पतालहरुले घर पठाएका हुन्।

सुदूरपश्चिम प्रदेशको सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले नियमित प्रेस व्रिफिङमा प्रदेशका ९ वटा अस्पतालमा कोरोना संक्रमितको उपचार भईरहेको जानकारी दिए।

‘महाकाली अस्पताल ३५, टीकापुर अस्पतालमा २३, डडेल्धुरा अस्पतालमा २३, सेती प्रादेशिक अस्पतालमा २२, जिल्ला अस्पताल अछाममा १०, जिल्ला अस्पताल डोटीा तीन, बाजुरा अस्पताल र महाकाली अस्पतालमा दुईरदुई र जिल्ला अस्पताल बझाङमा एक जना संक्रमित गरी नौँ वटा अस्पतालमा एक सय १९ जनाको उपचार भईरहेको छ।’ कार्कीले भने।

बाँकी संक्रमितको नौँ वटै जिल्लामा रहेका स्थानीय तहको आइसोलेसनमा उपचार भईरहेको दावी उनको छ। छ सय १७ जना संक्रमित मध्ये एक सय १९ जनाको नौँ अस्पतालमा उपचार भईरहेको छ भने एक सय ११ जना डिस्चार्ज भईसकेका छन्।

यस्तै पाँच जनाको मृत्यु भईसकेको छ। बाँकी तीन सय ८२ जना संक्रमितको अवस्थाको विषयमा भने सामाजिक विकास मन्त्रालय अनभिज्ञ छ। तीन सय ८२ जनामा अधिकासं घरमै छन् भने केहीलाई क्वारेन्टिनमा राखिएको छ। स्थानीय तहहरुले कोरोना रिपोर्ट नआउँदै धमाधम क्वारेन्टिनबाट घर पठाउन थालेपछि समुदायस्तरमा संक्रमण फैलिने खतरा समेत बढेको छ।