डोटीमा रासनसंगै लुकाएर लैजादै गरेको १४७ पेटी मदिरा बरामद

डोटी- लकडाउनको बेला ओसारपसार गरिरहेको अवस्थामा तीनलाखभन्दा बढी मुल्यको मदिरा प्रहरीले बरामद गरेको छ । सिलगढीबाट पुर्वीचौकी गाउँपालिका–२ वगलेग तर्फ लैजादै गरेको एक सय ४७ पेटी मदिरा सोमबार जिल्ला प्रहरी कार्यालय डोटीको टोलीले बरामद गरेको हो ।

उक्त मदिरा बगलेगका व्यवसायी झनक ठकुल्लाको रहेको जिल्ला प्रहरी कार्यालय डोटीका सूचना अधिकारी प्रहरी निरीक्षक कर्ण बोहराले जानकारी दिए । उनका अनुसार पुकार ओरेन्ज नामक सौँफी ४४ पेटी, किसमिस नामक सौँफी ८७ पेटी, स्वीफ्ट नामक मदिरा छ पेटी र रियल गोल्ड ५०० नामक स्ट्रोङ्ग वियर १० पेटी प्रहरीले बरामद गरेको छ ।

सो मदिरा पुर्वीचौकी गाउँपालिका–२ वगलेगकै धनबहादुर ओलीको से १ प १०३१ नम्बरको ट्याक्टरमा ढुवानी भईरहेको अवस्थामा प्रहरीले समातेको छ । चामल, चिनी र गहुँसंगै ट्याक्टरमा लुकाएर लैजादै गरेको सूचनाका आधारमा प्रहरीले सिलगढीदेखी बगलेग जानेबाटोमा पुगेर ट्याक्टरमा खानतलासी गर्दा मदिरा भेटिएको हो ।

बरामद भएको सामाग्री सिलगढीस्थित आफ्नै गोदामबाट लगेको व्यवसायी ठकुल्लाले बताएको प्रहरी निरीक्षक बोहराले बताए । उनले सो मदिराको खुद्रा मुल्य करिब तीनलाख हुनआउने जानकारी दिए ।

व्यवसायी ठकुल्लासंग लाईसेन्स भए÷नभएको नखुलेको जिल्ला प्रहरी कार्यालय डोटीले जनाएको छ । ‘जे भएनी लकडाउनको बेला मदिरा ओसारपसारमा रोक लगाईएको अवस्थामा ढुवानी भईरहेको भेटिएको छ,’ प्रहरी निरीक्षक बोहराले भने,‘थप अनुसन्धान सहित कानुनी प्रकृयाअनुसार कारबाही अगाडी बढाउछौ ।’