२०७८ श्रावण ८, शुक्रबार
July 23, 2021, Friday

अर्गानिक खाना र मन शान्तिका लागि गणेशकाँडा

डोटी- मानसिक तनाव, शारीरिक थकान मेट्न र लेकाली अर्गानिक खाना खानका लागि उपयुक्त गन्तव्य हो गणेश काँडा । केआईसिंह गाउँपालिका– १ मा पर्ने उक्त गाउँ पछिल्लो समय होमस्टेका रुपमा पनि चिनिन्छ ।

डाँडामाथिको स्यानो गाउँ, टाढा–टाढा घर भएको मगर समुदायको बस्ती रहेको उक्त गाउँ समुद्री सतहदेखि दुई हजार दुई सय मिटर उचाइमा रहेको छ । बाह्रैमास चिसो हुने उक्त गाउँमा केही वर्ष यता आन्तरिक पर्यटकहरु जाने गरेका छन् । गाउँमा कच्ची सडक पुगेका कारण मोटर साइकलमा त्यहाँ जाने पर्यटकहरुलाई सहज भएको छ ।

सहरको कोलाहल, दैनिक कामको थकान, मनको बेचैनी, दैनिक आइपर्ने मानसिक तनावबाट केही समय मुक्त हुन र शुद्ध अगार्नीक खानाको भोक मेट्न आन्तरिक पर्यटकहरु त्यहाँ जाने गरेका छन् । वरपरबाट जङ्गलले घेरेको डाँडामाथिको सो गाउँ क्षेत्रमा चराहरुको चिरबिर, भैँसी गोरुहरुको घाडाको आवाज, केही व्यक्तिहरुको गुनगुन आवाज मात्रै सुनिन्छ । पाहुनाहरुको विषेश स्वागत सत्कार गर्ने पुरानो प्रचलन गणेश काँडाका मगर समुदायले कायम राखेका छन् । माटोले पोतेको, खरले छायको होचा स्याना तर चिटिक्क देखिने घरहरुमा रात गुजार्दा निकै आनन्द महसुस हुन्छ ।

चिसो हावा, वरिपरि देखिने सुन्दर प्रकृतीको दृश्य, मगर समुदायको न्यानो स्वागत सत्कारले मन प्रफुल्ल हुन्छ । स्याना झुपटीमा रमाइरहेका मानिसमा देखिने मुस्कान, खुसी सहितका जीवन र सन्तुष्टि देखेर खुसी खोज्दै भागेका मनहरु त्यहाँ गएर शान्त हुन्छन् । सरल जीवनशैली, सरल अर्गानिक खानपिन, लेकाली भेगको मोह लाग्दो हावा पानि देखेर महलबाट बिचलित भएर त्यहाँ पुगेका मनहरुमा शान्तिले मात्रै छुँदैन आफ्नो अवस्था, व्यवस्था प्रति सन्तुष्टि पनि दिलाउँछ ।

स्थानीय जातको अर्गानिक खाना

गणेशकाँडामा बाह्रैमास स्थानीय जातको अर्गानिक खाना पाइन्छ । बालीहरु फलाउन स्थानीयहरुले गोठेमल मात्रै प्रयोग गर्ने गरेका छन् । बारीमा रसायनिक मल प्रयोग नहुने भएकाले त्यहाँका उत्पादनलाई अर्गानिक भनिदै आएको छ ।


धान, गहुँ, जस्ता अन्न कमै मात्रामा उत्पादन हुने स्थानीयहरु बताउँछन् । चोतो (स्थानीय जानको मुला) मकै, कोदो, फापर, उखु, पिँडालु, आलु, सिमि, काँक्रा उत्पादन हुने गरेको स्थानीय भरत रोका मगर बताउँछन् ।
सिन्कीको झोल, सिस्नोको साग, कोदाको ढिँडो, अन्नबाट बनाएको लोकल मदिरा अझै पनि गणेशकाँडामा खान पाइन्छ । स्थानीय जातका कुखुरा, बाख्रा, भेडा, गाई, भैंसी जस्ता पशुपञ्छी घरैपिछे पालिएको हुन्छ । दुध, दही, मह, लोकल कुखुरा, खसी भेडाको मासु पनि खान पाईन्छ ।

पर्यटनका लागि प्रचुर सम्भावना

गणेशकाँडा पर्यटनका लागि प्रचुर सम्भावना बोकेको के.आई.सिंह गाउँपालिका मध्यको एक ठाउँ हो । गाउँपालिकामा थुप्रै पर्यटकीय ठाउँहरु छन् । ती मध्य विषेश सम्भावना बोकेको ठाउँ हो गणेशकाँडा ।

गाउँपालिकाभित्र गणेश काँडा र पिलेगडा गरी दुईवटा मगरहरुको बसोबास भएका गाउँ छन् । उक्त गाउँहरु आन्तरिक र वाह्य पर्यटकका लागि प्रचुर सम्भावना बोकेका क्षेत्र हुन् । गणेशकाँडा सुदूरपश्चिमका पहाडी जिल्लाहरुकै पहिलो होमस्टेका रुपमा चिनिन्छ ।

गाउँपालिकाको केन्द्र वायलबाट ११ किमि दूरीमा रहेको गणेशकाँडा गाउँलाई सडकले जोडिसकेको छ । आन्तरिक पर्यटकहरु बेलाबखत मोटरसाइकलको यात्रा गर्दै गइरहेका हुन्छन् । गाउँमा अल्लोको कपडा बनाउने गर्छन् यहाँका महिला । जुन कोट सिलाउन प्रयोगमा ल्याइन्छ ।

अर्गानिक खानेकुरादेखि चारैतिर देखिने हिमाल, डाँडाकाँडाको सुन्दर दृश्य हेर्नका साथै मगर समुदायको संस्कृतिको अध्ययन गर्न पाइन्छ । बैशाख जेठ, भाद्र, आश्विनतिर चारैतिरको दृश्य राम्रो देखिन्छ । हिउँदमा हिउँ खेल्न त्यतिकै रमाइलो हुन्छ ।

गाउँपालिकाले गणेशकाँडा लगायत थुप्रै पर्यटकीय संभावना बोकेका सम्पदाहरुको पहिचान गरी संरक्षण र प्रवर्धका लागि गुरु योजना तयार पारेर अघि बढिरहेको छ ।

कसरी पुग्ने गणेश काँडा ?

काठमाडौंदेखि धनगढीसम्मको दूरी ६८० कि.मी. बसको यात्रा गर्दा १६ घन्टा र हवाइ यात्रा गर्दा एक घण्टा १५ मिनेटमा पुगिन्छ । धनगढीदेखि दिपायलको दूरी १८५ कि.मि. छ । बसमा धनगढीबाट ६ घन्टामा दिपायल पुगिन्छ ।

दिपायलदेखि गाउँपालिका कार्यालय रहेको क्षेत्र वायलसम्मको दूरी १० कि.मि. कालोपत्रे र १० कि.मि. कच्ची सडक गरी २० कि.मि. छ । जीपमा १ घन्टा ३० मिनेट ।

गाउँपालिकाको केन्द्र वायल देखी गणेशकाँडाको दुरी ११ किलोमिटर छ । कच्चि बाटो भएका कारण मोटरसाइकलको यात्रा राम्रो हुन्छ । बोलेरो, फोरपिल्लर पिकप जीपहरुमा पनि यात्रा गर्न सकिन्छ ।

Related News

प्रेम आलेसहित ओली समूहका सांसदले दिए देउवालाई विश्वासको मत
प्रेम आलेसहित ओली समूहका सांसदले दिए देउवालाई विश्वासको मत
  • २०७८ असार १३

काठमाडौं : नेकपा (एमाले) अध्यक्ष केपी ओली समूहका केही सांसदले कांग्रेस सभापति एवम् प्रधानमन्त्री शेरबहादुर देउवालाई विश्वासको मत दिएका छन्...

प्रधानमन्त्री देउवाले पाए विश्वासको मत, पक्षमा १६५ विपक्षमा ८३
प्रधानमन्त्री देउवाले पाए विश्वासको मत, पक्षमा १६५ विपक्षमा ८३
  • २०७८ असार १३

काठमाडौं– प्रधानमन्त्री शेरबहादुर देउवाले संसद्मा विश्वासको मत पाएका छन्। प्रतिनिधिसभाको आइतबार बसेको दोस्रो बैठकमा देउवाले संसदमा रहेका कुल सांसद संख्याको १६५ मत...

प्रधानमन्त्री देउवाले बहुमतले विश्वासको मत पाउने पक्का, यस्तो छ अंकगणित
प्रधानमन्त्री देउवाले बहुमतले विश्वासको मत पाउने पक्का, यस्तो छ अंकगणित
  • २०७८ असार १३

काठमाडौं– जनता समाजवादी पार्टी (जसपां) नेपालका अध्यक्ष महन्थ ठाकुर पक्षले पनि विश्वासको मत दिने भएपछि प्रधानमन्त्री शेरबहादुर देउवाले विश्वासको मत...

TOP