२०७८ आश्विन ९, शनिबार
September 25, 2021, Saturday

डोटीमा कोरोना संक्रमण दोस्रो चरणमा प्रवेश : भारतबाट आएका व्यक्तिका आफन्तमा देखियो संक्रमण

डोटी- डोटीमा भारतबाट आएका व्यक्तिबाट आफन्तलाई कोरोना भाइरसको संक्रमण भएको पाइएको छ । यससँगै डोटीमा संक्रमण दोस्रो चरणमा प्रवेश गरेको छ ।

संक्रमण दोस्रो चरणमा प्रवेश गर्नु भनेको स्थानीय व्यक्ति संक्रमित हुनु हो । भारतबाट फर्किएका शिखर नगरपालिका वडा नं. ३ आलीका तीन युवककी २५, ३१ र ३३ वर्षीया श्रीमतीमा संक्रमण सरेको शुक्रबार पुष्टि भएको हो । यो पुष्टिसँगै डोटीमा कोभिड–१९ संक्रमण दोस्रो चरणमा प्रवेश गरेको छ ।

डोटीमा यसअघि भारतबाट आएकामा मात्र संक्रमण देखिएको थियो । जिल्लामा पहिलोपटक भारतबाट आएका युवकमा जेष्ठ १९ गते संक्रमण पुष्टि भएको थियो । क्वारेण्टाइनबाट घर गएको दुई दिन पछि पिसिआर रिपोर्ट पोजेटिभ आएका १५ जनाको पहिलो सम्पर्कमा आएका संक्रमितका १५ जना आफन्तको स्वाब संकलन गरि पठाइएको थियो । जसमध्य यस अघि पाँच जना संक्रमितको सम्पर्कमा आएका आफन्त पाँच जनाको रिपोर्ट नेगेटिभ आएको छ भने तीन जना संक्रमितको पहिलो सम्पर्कमा आएका उनिहरुका तीन जना श्रीमतीको पिसिआर नतिजा पोजेटिभ आएको छ । त्यस्तै पाँच जना संक्रमितको पहिलो सम्पर्कमा आएका पाँच जनाको रिपोर्ट आउँन बाँकी छ ।

विश्व स्वास्थ्य संगठनका अनुसार कोरोना संक्रमण भएको १० दिन सम्म लक्षण नदेखिएका संक्रमितले अरुमा भाइरस सार्न नसक्ने शिखर नगरपालिकाका स्वास्थ्य इकाई प्रमुख हरिश शाहले बताए । संक्रमण भएको १२ दिन अघि नै लुकिचोरी परिवारको सम्पर्कमा आएको भए संक्रमण सरेको हुनसक्ने शाहले बताए ।

संक्रमित क्वारेण्टाइनमा बसेका समयमा खाना पु¥याउने, भेटघाट गर्ने, सामान वसार–पसार गर्ने, पैंसा आदान–प्रदान गर्ने कार्यमा संलग्न भएको अवस्था र क्वारेण्टाइनमा बसेका संक्रमितबाट त्यहि बसेका अर्को व्यक्तिमा घर जानेबेला भाइरस सरेको अवस्थामा मात्रै संक्रमितको सम्पर्कमा आएका व्यक्तिमा भाइरस सर्ने सम्भावना हुने चिकित्सकहरु बताउँछन् ।

डोटीमा भने भारतबाट आएको १९ दिन क्वारेण्टाइनमा बसेर घर फर्किएका व्यक्तिबाट उनिहरुका आफन्तमा संक्रमण सरेको छ । १९ दिन क्वारण्टाइनमा बसेर घर फर्किएको तीन दिन पछि मात्रै आफुमा कोरोना संक्रमण छ भनेर जानकारी पाएका संक्रमितहरु घर परिवार, समुदायमा घुलमिल भैसकेको बताउँछन् । गाउँमा संक्रमित र उनिहरुका परिवारको सम्पर्कमा आएकाहरु त्रसित बनेका छन् भने संक्रमितमा अहिले सम्म कुनै लक्षण नदेखिएका कारण संक्रमित र उनिहरुका परिवारले कोरोना भाइरसको संक्रमण छ भन्ने विश्वास समेत गर्न सकेका छैनन् ।

पिसिआर रिपोर्ट ढिलो आउँदा जोखिम बढ्यो

भारतबाट आएर क्वारेण्टाइनमा बसेकाहरुको पिसिआर रिपोर्ट ढिलो आउँदा कोरोना संक्रमणको जोखिम बढेको पाइन्छ । रिपोर्ट नै ढिलो आएपछि समुदायमा संक्रमणले जरा गाढेको छ ।

जेठ १२ गते देखि एउटै क्वारेण्टाइनमा बसेका २६ जना मध्य १६ जनामा कोरोना संक्रमण भएको रिपोर्ट असार १ गते मात्रै आएको थियो । सोही समुहका एक जनामा भने १९ गते नै कोरोना पुष्टि भएको थियो । श्रीमती र छोरी सहित भारतबाट फर्किएका उनका छोरीलाई ज्वरो आएपछि जेठ १५ गते जिल्ला अस्पताल भर्ना गरिएको थियो । १९ गते ती पुरुषको कोरोना रिपोर्ट पोजेटिभ आएको थियो भने उनका छोरा र श्रीमतीको रिपोर्ट नेगेटिभ आएको थियो । उनि डोटी जिल्लाका पहिलो संक्रमित थिए ।

उनको ‘कन्टयाक्ट ट्रेसिङ’का आधारमा जेठ २० गते उनि संगै आएका र एउटै क्वारेण्टाइनमा बसेकाहरुको ‘थ्रोट स्वाब’ संकलन गरेर परीक्षणका लागि धनगढीस्थित कोरोना प्रयोशालामा पठाइयो । जेठ २० गते स्वाब संकलन गरी परीक्षणका लागि पठाएकाहरुको असार १ गते १३ दिन पछि मात्रै रिपोर्ट आयो । जसमध्य १५ जनामा कोरोना पुष्टि भयो । भारतबाट आएपछि क्वारेण्टाइनमा १९ दिन विताइसकेका उनिहरु घर जान हतारिए र होम क्वारेण्टाइनमा बस्ने गरी घर पठाइयो । रिपोर्ट नआउन्जेल होम क्वारेण्टाइनमा बस्न भने पनि उनिहरु घरमा सबै संग घुलमिल भए । आफुहरु रिपोर्ट आउँनुअघि घरायसी काम देखि गाउँलेसँग सम्पर्कमा गैसकेको उनिहरु बताउँछन् ।

संक्रमितमा लामो समय सम्म स्वास्थ्य समस्या नदेखिए पछि रिपोर्टको पर्खाइमा बसेका संक्रमित उनिहरुका आफन्त र गाउँले समेत कोरोना छैन भन्नेमा ढुक्क भए । नयाँ संक्रमितहरु स्थानीय बासीको सम्पर्कमा गैसकेको बुझिएको छ । मेलापात खेतीपातीको काम गर्दा समुदायमा पनि संक्रमण फैलिएको हुन सक्ने भएकाले सो गाउँका सबैको पिसिआर परिक्षण हुनु पर्ने स्थानियको माग छ ।

डोटीमा अहिले सम्म भारतबाट आएकाहरुको मात्रै पिसिआर परिक्षण गर्न सकिएकाले अहिले सम्म समुदायमा संक्रमण छ छैन भन्ने यकिन हुन नसकेको स्वास्थ्य कार्यालय डोटीका प्रमुख रमेश मलासीले बताए । भारतबाट आएका व्यक्तिबाट अर्को व्यक्तिमा संक्रमण भएको पहिलो घटना भएको बताउँदै मलासीले उनिहरुको ‘कन्टयाक्ट ट्रेसिङ’का आधारमा पहिलो सम्पर्कमा आएका व्यक्तिको पिसिआर परिक्षण गरिने बताए ।

डोटीमा यो समाचार तयारपार्दा सम्म संक्रमितको संख्या दुई सय ५५ पुगेको छ । शनिबार आज मात्रै डोटीका थप ४० भन्दा बढीमा संक्रमण पुष्टि भएको स्रोतले जानकारी दिएको छ ।

Related News

धनगढीमा चक्कु हानाहान, २ जना घाइते
धनगढीमा चक्कु हानाहान, २ जना घाइते
  • २०७७ असार १३

धनगढी – धनगढीमा दुई समूहबीच विवाद हुँदा चक्कु हानाहान भएको छ। मासु पसल सञ्चालनको विषयलाई लिएर दुई पक्षबीच विवाद भएपछि चक्कु...

राजधानी तोकेको तीन वर्ष : पूर्वाधारका कामले गति लिन सकेन
राजधानी तोकेको तीन वर्ष : पूर्वाधारका कामले गति लिन सकेन
  • २०७७ असार १३

कैलाली- सुदूरपश्चिम प्रदेश सरकारले कैलालीको गोदावरीलाई स्थायी राजधानी तोकेको तीन वर्ष पुग्न लाग्दा पनि आवश्यक पूर्वाधार निर्माणको कामले गति लिनसकेको...

खलङ्गामा जडित सिसीटिभी क्यामेरा दुई वर्षमै बिग्रिए
खलङ्गामा जडित सिसीटिभी क्यामेरा दुई वर्षमै बिग्रिए
  • २०७७ असार १३

दार्चुला: दुर्घटना न्यूनीकरण तथा सुरक्षा निगरानीका लागि भन्दै सदरमुकाम खलङ्गामा दुई वर्षपहिले जडान गरेका सिसीटिभी क्यामेरा बिग्रिएका छन्। जिल्ला प्रहरी कार्यालयले...

TOP