२०८३ भाद्र ३, बुधबार
August 19, 2026, Wednesday
शिखर समाचार
धनगढी – सुदूरपश्चिम प्रदेशका नवनियुक्त मुख्यमन्त्री खगराज भट्टले स्वास्थ्य सेवा सुधारलाई प्राथमिकतामा राख्दै प्रदेशभर डायलाइसिस सेवा विस्तार गर्ने निर्णय गरेका छन्।
शुक्रबार मुख्यमन्त्रीमा नियुक्त भट्टले पद तथा गोपनीयताको शपथ लिएर कार्यभार सम्हालेपछि बसेको पहिलो मन्त्रिपरिषद् बैठकले प्रदेशका विभिन्न अस्पतालमा डायलाइसिस शय्या थप गर्ने निर्णय गरेको मुख्यमन्त्री तथा मन्त्रिपरिषद्को कार्यालयले जनाएको छ।
निर्णयअनुसार सेती प्रादेशिक अस्पतालमा ५, महाकाली प्रादेशिक अस्पतालमा ४ र टीकापुर प्रादेशिक अस्पतालमा ३ डायलाइसिस शय्या थप गरिनेछ।
यस्तै, लम्कीचुहा अस्पतालमा ५ तथा बयलपाटा र जोगबुडा प्रादेशिक अस्पतालसहित प्रदेशका सबै जिल्ला अस्पतालमा २–२ डायलाइसिस शय्या विस्तार गरिने भएको छ।
प्रदेशका विभिन्न क्षेत्रमा पर्याप्त डायलाइसिस सेवा उपलब्ध नहुँदा मिर्गौला रोगका बिरामी नियमित उपचारका लागि लामो दूरी तय गर्न बाध्य हुँदै आएका छन्।
डायलाइसिस सेवा विस्तार भएपछि नियमित उपचार आवश्यक पर्ने बिरामीलाई उपचारका लागि टाढा जानुपर्ने बाध्यता केही हदसम्म कम हुने प्रदेश सरकारको अपेक्षा छ।
प्रदेशका सबै जिल्ला अस्पतालसम्म सेवा विस्तार गर्ने निर्णयले विशेषगरी दुर्गम तथा पहाडी जिल्लाका बिरामीलाई प्रत्यक्ष लाभ पुग्ने अपेक्षा गरिएको छ।
पहिलो मन्त्रिपरिषद् बैठकले विभिन्न आन्दोलनका क्रममा ज्यान गुमाएका सहिदहरूप्रति श्रद्धाञ्जलीसमेत व्यक्त गरेको छ।
शुक्रबार मुख्यमन्त्री भट्टसँगै नेकपा एमालेबाट सामाजिक विकासमन्त्री सन्तोषकुमारी शर्मा थापा, आर्थिक मामिलामन्त्री चक्र मल्ल, भूमि व्यवस्था, कृषि तथा सहकारीमन्त्री दमन भण्डारी तथा एक राज्यमन्त्रीले पनि पद तथा गोपनीयताको शपथ लिएका थिए।
पदभार ग्रहण गर्दै मुख्यमन्त्री भट्टसहित नवनियुक्त मन्त्रीहरूले नागरिकमैत्री, प्रभावकारी र सहज सेवा प्रवाहलाई प्राथमिकतामा राखेर काम गर्ने प्रतिबद्धता जनाएका छन्।
उनीहरूले संघीयताको मर्मअनुसार प्रदेश संरचनालाई प्रभावकारी बनाउँदै सुशासन, पारदर्शिता र नागरिकको सहज पहुँचलाई केन्द्रमा राखेर सरकार सञ्चालन गर्ने बताएका छन्।
मकवानपुर स्कारपियो दुर्घटनामा बैतडीकी महिलाको मृत्यु बैतडी – मकवानपुरमा स्कारपियो...
