कैलाली बहुमुखी क्याम्पसको क्वारेण्टाइनमा रहेकालाई सम्बन्धित जिल्ला पठाउने तयारी

शिस डेस्क– भारतको पलिया क्वारेण्टाइनमा २६ दिन बसेर नेपाल प्रबेश गरी कैलाली बहुमुखी क्याम्पसको क्वारेण्टाइनमा राखिएकालाई सम्बीनधत जिल्ला पठाउने तयारी भैरहेको छ । भारतबाट आएर कैलालीमा अलपत्र परेका ७७८ जनालाई प्रध्यापक संघका अध्यक्ष डा. लोक बिष्ट, धनगढी उपमहानगरपालिका वडा नं. १ का वडाध्यक्ष, प्रशासकीय अधिकृत शिवराज जोशी लगायतको पहलमा क्वारेण्टाइनमा राखिएको थियो ।

क्याम्पसको क्वारेण्टाईनमा राखिएका ७७८ जना मध्य धनगढी उपमहानगरपालिकाका ३७ जना, डोटीका ७ जना, काठमाण्डौंका ४ जना, बाजुराका ३ जना र अछामका १ जना क्वारेण्टाईनमै छन् । डोटीका ७ जना, बाजुराका ३ जना र अछामका १ जनालाई सम्बन्धित जिल्लाका प्रशासन तथा स्थानिय तह संगको समन्वयमा पठाउने तयारी भएको प्रध्यापक संघका अध्यक्ष डा. बिष्टले बताए । उनले अन्य जिल्लाकालाई यस अघि पठाइसकेको बताए ।

त्रिनगर भन्सार हुँदै गत २ गते कैलाली प्रवेश गरेका उनिहरुको व्यवस्थापनका लागि प्रदेश सरकारले कुनै चासो नदेखाए पनि केही व्यक्तिको पहलमा क्वारेण्टाइनमा राखेर सम्बनिधत जिल्ला र स्थानिय तहहरु समन्वय गरेर पठाउने कार्य भैरहेको छ ।

डोटीका प्रमुख जिल्ला अधिकारी टेकनारायण पौडेलले अलपत्र उनिहरुलाई जिल्ला भित्र्याउने तयारी भैरहेको बताए । उनले डोटी अछाम र बाजुराका लाई डोटी सम्म गाडीको व्यवस्था गरेर पठाउन भनेका छन् । शिखर समाचार संगको कुराकानीमा पौडेलले भने,‘प्रदेश सरकारले सम्बन्धित जिल्ला सम्म पुर्याउने व्यवस्था गरिदिनु पर्ने तर त्यो भएन हामीले भाडा यताबाट व्यवस्थापन गछौं पठाइदिनुस् भनेका छौं, बरु अछाम र बाजुराकालाई हामी यतैबाट अर्को व्यवस्था गरेर पठाउँछौं ।’

प्रमुख जिल्ला अधिकारीले पौडेलले जिल्ला भित्र्याएका सबैलाई अनिवार्य सम्बन्धित पालिकाको क्वारेण्टाइनमा राखिने बताए ।