शिखर नगरपालिकाका ७२ जना क्वारेण्टाइनमा

बुधबार भारतका बिभिन्न ठाउँबाट कैलालगि हुँदै गृह नगर पुगेका शिखर नगरपालिकाका ७२ जनालाई क्वारेण्टाइनमा राखिएको छ । उनिहरुका लागि नगरपालिकाले ४ वटा बिद्यालयमा क्वारेण्टाइनको व्यवस्था गरेको हो ।

नगरपालिकाको २ र ३ नम्बर वडामा घर भएका १९ जनालाई अमरज्योती आधारभुत बिद्यालय, आलीमा राखिएको छ । त्यस्तै वडा नन्बर ४, ५ र ६ मा घर भएका २७ जनालाई पञ्चोदया आधारभुत बिद्यालय, धुरकोटमा राखिएको छ भने वडा नं. ७ र ९ मा घर भएका १५ जनालाई मष्टा आधारभुत बिद्यालय, बोरागाउँमा राखिएको छ । त्यस्तै वडा नम्बर १० र ११ मा घर भएका ११ जनालाई शिद्धेश्वर माध्यमिक बिद्यालय, बाण्डुग्रीसैनमा राखिएको नगर स्वास्थ्य इन्चार्ज हरिष शाहले बताए ।

आजका लागि क्वारेण्टाइनमा चाहिने सामग्री र खाना÷नास्ताको व्यवस्था सम्बन्धित वडाहरुले गर्ने गरेर पठाईएको छ । भोली देखि आफु सहित स्वास्थ्यको टिम क्वारेण्टाइनको अवलोकनमा जाने र परामर्श दिने नगर प्रमुख सिताराम जोशीले बताए । उनले क्वारेण्टाइमा चाहिने सामग्री र खाना, नास्ताको व्यवस्था वडाले गर्न नसकेको खण्डमा नगरले खाध्यान्न लुगाकपडा र औषधि लगायतको व्यवस्था गर्ने बताए ।

आज पनि क्वारेण्टाइनमा बस्ने सबैलाई कोरोना बारे परामर्श दिनुका साथै माक्स उपलब्ध गराएको बताउँदै स्वास्थ्य प्रमुख शाहले भोलिबाट सम्बन्धित क्वारेण्टाइनमा नै पुगेर परामर्श, औषधि उपचार तथा स्वास्थ्य चेकजाँच गरिने बताए । आजको स्वास्थ्य चेकजाँचमा कैसैमा त्यस्तो समस्या नदेखिएको उनको भनाई थियो ।

बडिकेदार गाउँपालिकाका ३५ जना क्वारेण्टाइनमा

मंगलबार राती बडिकेदार गाउँपालिका १ बिपि नगर पुगेका ३५ जनालाई क्वारेण्टाइनमा राखिएको छ । जसमा १ जना जोरायल गाउँपालिका, ४ जना कैलालीको महोन्याल गाउँपालिका र ३० जना बडिकेदारा गाउँपालिकाका रहेकाछन् ।

अहिले सबैलाई बिपिनगरको केदारज्योतीकुञ्ज बहुमुखी क्याम्पसमा गाउँपालिकाले स्थापना गरेको क्वारेण्टाइनमा राखिएको गाउँपालिकाका स्वास्थ्य इनचार्ज योगेन्द्र शाहीले बताए । उनले क्वारेण्टाइनमा राखिएका सबैको नियमित स्वास्थ्य जाँच भैरहेको बताउँदै अहिले सम्म कसैमा स्वास्थ्य समस्या नदेखिएको बताए ।

गत राती बिपि नगरमा ५१ जना यात्रु झरेको प्रहरीले जनाएको छ । ५१ जना मध्य १६ जना बडिकेदार गाउँपालिकाका भएकाले सम्बन्धित गाउँपालिकाको क्वारेण्टाइनमा राख्ने गरि पठाईको इलाका प्रहरी कार्यालय बिपिनगरका इन्सपेक्टर लाल बहादुर ऐरले बताए ।

क्वारेण्टाइनमा बसेका बढी जस्तो ब्यक्तिहरु कैलालीबाटै आएको बताउँदै गाउँपालिकाका उपाध्यक्ष इन्द्रा भााटले क्वारेण्टाइनमा राखेका सबैको खान तथा बासको व्यवस्था गाउँपालिकाले गर्ने बताईने । उनले भाइरस संक्रमण नबढोस् भनेर चेकजाँच, परामर्श तथा सचेतनाका कार्यक्रमहरु सञ्चालन गरेको बताइन् ।

आदर्श गाउँपालिकाका ६७ जना क्वारेण्टाइनमा

यस्तै जिल्लाको आदर्श गाउँपालिकाले पनि क्वारेण्टाइनको व्यवस्था गरेको छ । गाउँपालिकामा मंगलबार भित्रिएका ६७ जनालाई क्वारेण्टाइनमा राख्ने प्रयास भैरहेको गाउँपालिकाका अध्यक्ष टेकबहादुर रोकायाले बताए । उनले भारतबाट आएका ब्यक्तिहरु क्वारेण्टाइनमा बस्न नपाने पछि कठिनाई भएको बताए । उनले भने,‘हामिले खाने बस्ने सबै व्यवस्था मिलायएका छौं तर नाराबाजी गर्दै हामिलाई केहि भएको छैन हामि क्वारेण्टाइनमा बस्दैनौ भनेर होहल्ला गरिरहेकाछन् ।’

गाउँपालिकाका स्वास्थ्य इन्चार्ज बम खड्काले आफुहरु क्वारेण्टाइन व्यवस्थापनमा लागिरहेको बताए । क्वारेण्टाइनमा बस्ने ब्यक्तिहरु भाग्ने प्रयास गरिरहेका छन् खड्काले भने,‘अहिले सम्म प्रहरी प्रयोग गरेर रोकेका छौं जिल्लाबाट थप सुरक्षाकर्मीको माग गरेकाछौं । उहाँहरुलाई जसरि पनि क्वारेण्टानमा राखेर निगरानी राख्छौं ।’

इन्चार्ज खड्काले गाउँपालिकामा पुगिसकेपछि सबैको स्वास्थ्य जाँच गरेको बताउँदै अहिले सम्म कसैमा समस्या नदेखिएको बताए । क्वारेण्टाइनमा बसेका सबैको नियमित निगरानी स्वास्थ्यजाँच हुने उनले बताए ।

गाउँपालिकाले गाउँपालिकाको वडा नं. २ मौवामा अवस्थित सारदा माध्यमिक बिद्यालयमा क्वारेण्टाइन स्थापना गरेको छ ।

त्यस्तै गाउँपालिकाको वडा नं. २ बावनकाँडाका ५ जना सेल्फ क्वारण्टाइनमा बसेका छन् । उनिहरु गाउँ नजिकैको नवादेव आधारभुत बिद्यालयमा क्वारेण्टाइनमा बसेका छन् । ३ जना भारत र २ जना काठमाण्डौंबाट गाउँ फर्किएका ति ब्यक्तिले स्वयम् इक्षायर सेल्फ क्वारेण्टाइनमा बसेको बताएकाछन् ।

काठमाण्डौंबाट गाउँ आएका बिजयराज ओझा र विश्वनाथ ओझा क्वारेण्टाइनमा बसेका छन् । त्यस्तै भारतको मुम्बै बाट आएका राम प्रसाद ओझा, हेमराज ओझा र पन्जाव हरियणाबाट आएका रमेश कोली सेल्फ क्वारेण्टाइनमा बसेका हुन् ।

‘हामी सेल्फ क्वारेण्टाइनमा बसेका छौं । यो कुरा गाउँपालिकालाई पनि जानकारी गराएकाछौं,क्वारेण्टाइनमा बसेका बिजयराज ओझाले शिखर समाचार संग भने,‘हामिलाई सेनेटाइजर , ग्लोव्स , माक्स लगायतका सामग्रीको अभाव छ त्यसको व्यवस्था गरिदिनु प¥यो ।’ क्वारण्टायनमा बसेका पाँचै जनाको अहिलेसम्म स्वास्थ्यमा कुनै समस्या देखिएको छैन ।