डोटीमा दुई वटा कोरोना विशेष अस्पताल बनाउने तयारी

सुजङ्ग अस्पताललाई कोरोना विशेष बनाउन निर्णय हुन सकेन

डोटी- डोटीमा दुई वटा कोरोना विशेष अस्पताल बनाउने तयारी भैरहेको छ । शिक्षा विकास तथा समन्वय इकाईको सरकारी भवन र सुजङ्ग अस्पताललाई कोरोना विशेष अस्पताल बनाइने बारे छलफल भएको छ ।

जिल्लामा अहिलेसम्म कोरोना विशेष अस्पताल नहुँदा सिलगढीमा रहेको सरकारी कार्यालय भवन र राजपुरमा रहेको सुजङ्ग अस्पताललाई कोरोना विशेष अस्पताल बनाइने तयारी भैरहेको प्रमुख जिल्ला अधिकारी टेकनारायण पौडेलले बताए ।

कोरोना अस्पताल बनाउने सम्बन्धमा सोमबार जिल्लास्थित क्रियासिल राजनीतिक दल तथा अन्य सरोकारवाला निकायबीच सर्बपक्षीय बैठक बसेको थियो । बैठकले शिक्षा विकास तथा समन्वय इकाईको सरकारी भवनमा अस्पताल बनाउने निर्णय गरेको छ । सुजङ्ग अस्पताललाई कोरोना विशेष बनाउने निर्णय भने पारित हुन सकेको छैन । अस्पतालका लागि चाहिने स्रोत, साधन, कर्मचारी व्यवस्थापन खर्च कस्ले वेहोर्ने भन्ने बिषय उठेपछि ठोस निर्णय हुन नसकेको हो ।

अस्पतालको खर्च, जनशक्ति खर्च, प्रशासनिक खर्च कहाँबाट व्यवस्था गर्ने भन्ने सुनिस्चितता नभएपछि बैठक पुनः अर्को दिन बस्ने निर्णय भएको प्रमुख जिल्ला अधिकारी पौडेलले बताए ।

जिल्लामा रहेको एक मात्र जिल्ला अस्पताल डोटीमा अन्य बिमारीलाई पनि चेकजाँच गर्नुपर्ने भएकाले सुजङ अस्पताल र शिक्षा विकास तथा समन्वय इकाईको सरकारी भवनमा कोरोना विशेष अस्पताल बनाउन सर्बपक्षीय बैठक बसेको थियो ।

सरकारी भवनमा बनाइने कोरोना विशेष अस्पतालमा जिल्ला अस्पतालको जनशक्ति प्रयोग हुने छ । सुजङ्ग अस्पतालको जनशक्ति, अस्पतालको क्षती, प्रशासनिक खर्च कहाँबाट कसरी व्यहोर्ने भन्ने बिषयमा भने टुङ्गो लाग्न सकेको छैन ।

सुजङ्ग अस्पतालले आफु संग भएका जनशक्तिको तलव भत्ता, प्रशासनिक खर्च र क्षति सरकारले बेहोर्नु पर्ने माग राखेको छ । सामुदायिक अस्पताल भएकाले अस्पताल वरपरका स्थानियहरू र जनप्रतिनिधि सँग समेत समन्वय गरिनु पर्ने अस्पताल व्यवस्थापन समितिको जनाएको छ ।

यो सँगै बैठकले जिल्लाका एमबीबीसएस डाक्टर कार्यरत रहेका स्वास्थ्य संस्थामा कम्तीमा १० वेडसम्मको आइसोलेसन कक्ष तयार गर्नु पर्ने निर्णय गरेको छ ।

सोमबारसम्म डोटीमा ७ हजार भन्दा बढीको संख्यामा भारतबाट आइ क्वारेन्टाइनमा बसिरहेका र उनीहरुको व्यवस्थापनमा कठीनाइ भएको छ। त्यसका लागि सिमानाका नै बन्द गरेर २०/२० दिनको अन्तरालमा सिमानाका खोल्ने व्यवस्था गर्न समेत बैठकबाट संघीय तथा प्रदेश सरकारलाई अनुरोध पठाइएको छ ।

जिल्लामा कोरोना परीक्षणका लागि किट अभाव भएकाले किटको माग समेत गरिएको छ । १२ हजार आरटी पीसीआर भिटिएम तथा १० हजार आरडीटी किटको माग गरिएको जिल्ला समन्वय समितिका संयोजक रामबहादुर ऐरले बताए ।

यदि भारतबाट आउने व्यक्ति रोकिएनन् भने जिल्लास्थित सरकारी संरचनालाई समेत क्वारेन्टाइनका लागि प्रयोगमा ल्याइने संयोजक ऐरले बताए । 

डोटी जिल्लाबाहेक सुदूरपश्चिम प्रदेशका सबै जिल्लामा भारतबाट घर फर्किएका व्यक्तिमा कोरोना भाइरस देखिएपछि  स्थानीयमा त्रास देखिएको छ । जिल्लामा कोरोना परीक्षण किट अभावका कारण समयमै परीक्षण नहुँदा डोटीमा कोरोना संक्रमित व्यक्ति नदेखिएको स्थानीयको भनाइ छ।