सुदूरपश्चिममा ३–४ दिनभित्र मनसुन सक्रिय हुने, वर्षा र तातो लहरको सम्भावना

सुदूरपश्चिममा अबको ३–४ दिनभित्र मनसुन सक्रिय हुने, पहाडमा वर्षा र तराईमा तातो लहरको सम्भावना

जल तथा मौसम पूर्वानुमान महाशाखाको पूर्वानुमानः सुदूरपश्चिमका पहाडी क्षेत्रमा मेघगर्जनसहित वर्षा, तराईमा अझै गर्मीको असर कायम रहने

सुदूरपश्चिम प्रदेशमा आगामी तीनदेखि चार दिनभित्र मनसुन पूर्ण रूपमा सक्रिय हुने सम्भावना रहेको जल तथा मौसम पूर्वानुमान महाशाखाले जनाएको छ। महाशाखाका अनुसार हाल देशका पूर्वी प्रदेशहरूमा मनसुन सक्रिय रहे पनि सुदूरपश्चिमसहित कर्णाली प्रदेशमा मनसुन क्रमशः विस्तार हुने क्रममा रहेको छ।

हाल सुदूरपश्चिम प्रदेशको तराई क्षेत्र मुख्यतया सफा रहेको छ भने प्रदेशका केही स्थानमा आंशिक बदली रहेको महाशाखाले जनाएको छ। प्रदेशका एक-दुई स्थानमा हल्का वर्षा पनि भइरहेको छ।

आइतबार पहाडी क्षेत्रमा वर्षाको सम्भावना

महाशाखाका अनुसार आइतबार सुदूरपश्चिम प्रदेशका हिमाली तथा पहाडी भू-भागका थोरै स्थानमा मेघगर्जन तथा चट्याङसहित हल्कादेखि मध्यम वर्षाको सम्भावना रहेको छ।

त्यस्तै, सुदूरपश्चिमको तराईका एक-दुई स्थानमा पनि मेघगर्जन तथा चट्याङसहित हल्कादेखि मध्यम वर्षा हुन सक्ने पूर्वानुमान गरिएको छ।

तराईमा तातो लहरको जोखिम अझै कायम

वर्षाको सम्भावना रहे पनि सुदूरपश्चिम प्रदेशका तराई क्षेत्रहरूमा तातो लहर (Heat Wave) को प्रभाव कायम रहने महाशाखाले जनाएको छ। विशेष गरी तराईका बासिन्दालाई अत्यधिक गर्मीबाट बच्न आवश्यक सावधानी अपनाउन आग्रह गरिएको छ।

रातिको मौसम

रातिको समयमा सुदूरपश्चिम प्रदेशका पहाडी भू-भागका थोरै स्थान तथा हिमाली क्षेत्रका एक-दुई स्थानमा मेघगर्जन, चट्याङसहित मध्यम वर्षाको सम्भावना रहेको छ। मौसममा हुने परिवर्तनसँगै पहाडी क्षेत्रमा यात्रा गर्ने तथा कृषिमा संलग्न नागरिकलाई आवश्यक सतर्कता अपनाउन मौसमविद्ले सुझाव दिएका छन्।

महाशाखाले आगामी केही दिन मनसुन पश्चिमतर्फ थप सक्रिय हुँदै जाने भएकाले स्थानीय बासिन्दालाई मौसमसम्बन्धी अद्यावधिक सूचना नियमित रूपमा पछ्याउन अनुरोध गरेको छ।

स्रोतः जल तथा मौसम पूर्वानुमान महाशाखा