फागुन १ देखि सञ्चालन हुने महोत्सवबाट डोटीले पाउने छ प्रतिभावान “आइडल”

दिपायल – सामान्यतया महोत्सवले व्यापार, मेला, प्रदर्शनी र सांगीतिक कार्यक्रमलाई इङ्गित गर्दछ । त्यो सँगै पछिल्लो समय महोत्सवमा विचार विमर्श, विकास बहस जस्ता रचनात्मक क्रियाकलापहरु पनि हुने गर्दछन् ।

डोटीमा फागुन १ देखि १० गतेसम्म सञ्चालन हुने “डोटी महोत्सव”ले भने “डोटी आइडल” छनोट गर्ने भएको छ । डोटी उद्योग वाणिज्य संघले आयोजना गर्ने उक्त महोत्सवमा डोटीका १२ देखि ४० वर्ष उमेरका गायक/ गायिकाहरुको प्रतिस्पर्धाबाट एक जना आइडल छनोट गर्ने छ ।

विभिन्न कारणले अवसरबाट वञ्चित, गाउँठाउँमा थन्किएका प्रतिभाहरुलाई आइडल मार्फत उजागर गर्ने र सो खेत्रमा स्थापित गराउने उद्येश्यसहित महोत्सवको विशेष आकर्षणका रूपमा “डोटी आइडल” सञ्चालन गरिएको उद्योग वाणिज्य संघले जनाएको छ ।

आईतबार दिपयालमा पत्रकार सम्मेलनको आयोजना गरेर महोत्सव बारे जानकारी गराइएको थियो । दिपायलस्थित प्रस्तावित बसपार्क सेती बगरमा १० दिनसम्म महोत्सव संचालन हुने डोटी उद्योग वाणिज्य संघका अध्यक्ष बिक्रम साउँदले बताए ।

डोटीको पहिचान, संस्कृति र सम्भावनालाई एउटै थलोमा उजागर गर्ने उद्देश्यसहित महोत्सवको आयोजना गरिन लागिएको हो । महोत्सवका लागि संघका अध्यक्ष विक्रम साउँदको संयोजकत्वमा मूल आयोजक समिति गठन गरिएको छ। महोत्सवले डोटीको आर्थिक, सांस्कृतिक र पर्यटकीय सम्भावनालाई नयाँ उचाइमा पुर्‍याउने विश्वास लिइएको छ।

महोत्सव अवधिभर स्थानीय मौलिक नाच, गीत, वेशभूषा र संस्कृतिको प्रस्तुतिसँगै हस्तकला, जडीबुटी, खाद्य परिकार, स्थानीय उत्पादन, औद्योगिक तथा व्यापारिक प्रविधियुक्त सामग्रीको प्रदर्शनी समेत रहने जनाइएकाे छ।

महोत्सवमा प्रस्तुत गरिने धार्मिक तथा सांस्कृतिक झाँकी, खेलाडी र विद्यार्थीका खेल कौशल प्रदर्शन, मनोरञ्जनात्मक कार्यक्रम, बाल उद्यान, खेलकुद गतिविधि र स्थानीय तथा राष्ट्रिय कलाकारको प्रस्तुतिले महोत्सवलाई थप आकर्षक बनाउने आयोजकले जनाएको छ

महोत्सव सञ्चालनका लागि करिब ८५ लाख रुपैयाँ खर्च लाग्ने अनुमान गरिएको छ। महोत्सवलाई एक लाख भन्दा बढी दर्शकले अवलोकन गर्ने अपेक्षा गरिएको छ।