२०७९ मंसिर २३, शुक्रबार
December 9, 2022, Friday

मास्कमा कालोबजारी: पाँच पक्राउ

काठमाडौं – चीनबाट मास्क आपूर्ति हुन छाडेको छ। त्यसकारण एक महिनायता नेपालमा मास्कको खडेरी नै परेको छ। विज्ञ तथा डाक्टरहरूले कोरोना भाइरसको जोखिमबाट जोगिन मास्क लगाउन सुझाएसँगै त्यसको खोजी गर्नेको संख्या ह्वात्तै बढेको छ। बजारमा माग बढेसँगै व्यापारीले त्यसलाई कमाउने अवसरका रूपमा उपयोग गर्दा केही समयदेखि मास्क सजिलै पाउन छाडेको छ। बल्लबल्ल भेटिए पनि उपभोक्ता चर्को मूल्य तिर्न बाध्य छन्। यस्तो अवस्थामा पनि सरकारी निकाय र सरोकारवाला पक्षले बजारमा मास्कको हाहाकार हुने अवस्था आइनसकेको दाबी गर्छन्। सबैले मास्क प्रयोग गर्न थाल्दा अभाव सिर्जना भएको जिकिर व्यापारीहरूको छ।

यसैबीच आइतबार कपनबाट १० लाख ८ हजार मास्कसहित पाँचजनालाई प्रहरीले नियन्त्रणमा लिएको छ। पक्राउ पर्नेमा इमाडोल बस्ने टेकराज श्रेष्ठ, कपन बस्ने सञ्जय रेग्मी, स्वयम्भू बस्ने अजिम बक्स मियाँ, महानगरपालिका–१३ मा बस्ने सुरज गोयल र बागबजार बस्ने सुवास महेश्वरी छन्। प्रहरीका अनुसार उनीहरू फार्मेसीलाई तीन रुपैयाँ पर्ने मास्क ३१ रुपैयाँमा बेच्ने तयारीमा थिए। स्थानीयले दिएको सूचनाका आधारमा प्रहरी परिचालित भएको थियो। सोही क्रममा बरामद सय बोराभन्दा बढी मास्क अहिले महानगरीय प्रहरी परिसर काठमाडौंमा राखिएको छ। कालोबजारी गर्ने गिरोह भित्रभित्रै सल्बलाउन थालेपछि प्रहरीले व्यापक अनुगमनसँगै फार्मेसीहरूको खानतलासी गर्न थालेको छ। ‘बजारमा यति छिटो मास्क अभाव नहुनुपर्ने हो तर व्यापारीहरूले गद्दारी गरेपछि भएको सामान पनि सर्वसाधारणले किन्न पाएका छैनन्,’ परिसरका प्रवक्ता होविन्द्र बोगटीले भने, ‘कालोबजारी र अवैध सामान बिक्रीवितरण भएको देख्नुभयो भने हामीलाई खबर गर्नुहोला।’

बरादम मास्क जिल्ला प्रशासन कार्यालय काठमाडौंमा रेकर्डका लागि पठाउने र महान्यायाधिवक्ता, प्रहरी प्रधान कार्यालय, जिल्ला वकिलको कार्यालय, राजस्व विभाग, जिल्ला प्रशासन कार्यालयलगायको समन्वयमा साझा औषधि पसलबाट बिक्री गरिने बताए। उनका अनुसार मास्कको कालोबजारी गर्दै आइरहेको गिरोहले विभिन्न समूह बनाई मास्क आपूर्ति गर्दै आएको छ। मास्क कालोबजारीमा संलग्न पाँचैजना अहिले परिसरको हिरासतमा छन्। उनीहरूले काठमाडौं महानगरपालिका–१० विष्णुमती पुलस्थित रोहित श्रेष्ठको घर भाडामै लिएर मास्कको कालोबजारी गरेको भेटिएको छ।

आरडिजी सप्लायर्स कम्पनीमार्फत चर्को मूल्यमा मास्क खरिदबिक्री गर्दै आइरहेकाले उनीहरूमाथि अरू अनुसन्धान पनि गरिने प्रहरीको भनाइ छ। ‘मास्क मात्रै होइन, अन्य उपकरण, खेलकुदका सामान पनि उनीहरूले बिक्री–वितरण गर्दै आएका रहेछन्,’ प्रवक्ता बोगटीले भने, ‘उनीहरूबाट अरू रहस्य खुल्ने अनुमान छ।’ उनका अनुसार महानगरीय प्रहरी परिसर काठमाडौंले साझा औषधिपसलबाट पाँचदेखि १० रुपैयाँका दरले मास्क बिक्रीवितरण गर्नेछ। पक्राउ परेकाहरूलाई कालोबजारी तथा सामाजिक अपराध ऐन, २०३२ अनुसार कारबाही हुनेछ।

Related News

बैतडीमा जिप दुर्घटना,  एक जनाको मृत्यु
बैतडीमा जिप दुर्घटना, एक जनाको मृत्यु
  • २०७६ चैत्र ४

बैतडी- बैतडीमा जिप दुर्घटना हुँदा चालकको मृत्यु भएको छ ।...

TOP