यो सरकारले पुरानै कपि पेष्टको बजेट ल्यायोः नेपाली काँग्रेसका प्रदेश सभा सदस्य धामी

दिपायल– सुदूरपश्चिम प्रदेश सरकारले कुनै नयाँ ढंगले बजेट ल्याउन नसकेको नेपाली काँग्रेसका प्रदेश सभा सदस्य विक्रमसिंह धामीले बताएका छन् । आजदेखि शुरु भएको बजेटमाथिको छलफलमा भाग लिँदै उनले असार १ गते पेश भएको बजेट तथा कार्यक्रम र अहिलेको सरकारले ल्याएको बजेटमा कुनै भिन्नता नभएको बताएका हुन् ।

‘तत्कालिन समयमा हाम्रो यो बजेट तथा कार्यक्रममा असन्तुष्टि थियो । तर, सत्तागठबन्धन फेरिएसंगै केही फरक ढंगले बजेट तथा कार्यक्रम आउँछ भन्ने लागेको थियो’ उनले भने –‘तर, यसमा २० प्रतिशतपनि भिन्नता देखिन । पुरानै कपि पेष्ट भएर आएको छ । अब हामी प्रदेश सभा सदस्यहरुले नै यसमा निरुत्साहन गर्न तत्पर हुनुपर्छ ।’

उनले सत्तागठबन्धनको सरकार रहेकाले असन्तुष्टि हुँदा समेत पास गर्नुपर्ने बाँध्यताको अवस्था रहेको बताए । उनले भने –‘हाम्रा असन्तुष्टि त छदै छ । तर, तालि बजाएर पास गरौंला । गर्नुपर्छ । चित्त बुझोस नबुझोस् गर्नैपर्छ । तर एउटा सिस्टमका विषयमा सोच्ने वा नसोच्ने भन्ने जरुरी छ । आउने बजेट विधि अनुसार नआए हामी पक्षमा हुने छैनौं ।’