डोटीको जोरायलमा धार्मिक मेलामा धारिलो खुकुरी प्रहार गर्ने दुई युवक पक्राउ

दिपायल– डोटीको केदार देवताको धार्मिक मेलामा युवकमाथि धारिलो हतियार खुकुरी प्रहार गर्ने दुई युवक पक्राउ परेका छन् । मंगलबार जिल्ला प्रहरी कार्यालय डोटीले चुरे गाउँपालिका वडा नम्बर ३ शान्तिपुरका २७ वर्षिय आदर्श बिक्रम बिष्ट र २२ वर्षिय पवन साँउदलाई भाग्दै गरेको अवस्थामा पक्राउ गरेको हो ।

मंगलबार १ः३० बजेको समयमा जोरायल गाउँपालिकामा वडा नम्बर ४ थलि स्थित केदार देवताको मन्दिरमा युवाहरुबिच झैझगडा भएको जिल्ला प्रहरी कार्यालय डोटीका प्रहरी नायव उपरिक्षक भीमलाल भट्टभराईले जानकारी दिए ।

उनका अनुसार पुजापाठ तथा धार्मिक मेलामा फोटो भिडियो खिच्ने विषयमा विवाद भई झै झगडा हुंदा बिष्टले डोटी जोरायल गाउँपालिका वडा नम्बर ०४ काफली बस्ने २१ वर्षिय महेश बोहरा, युवराज बोहरा र किशोर बोहरालाई धारिलो हतियार खुकुरी प्रहार गरेका थिए ।

उनले फरार भएको भन्ने जानकारी प्राप्त हुनासाथ इलाका प्रहरी कार्यालय बिपिनगर डोटीबाट खटिएको प्रहरी टोलीले बिष्ट र साँउदलाई भाग्दै गरेको अवस्थामा नियन्त्रणमा लिएको बताए । पक्राउ परेका विष्ट र साउँदमाथि आवश्यक अनुसन्धान भईरहेको र घाइते महेश र युवराजलाई थप उपचारको लागी सेती प्रादेशिक अस्पतालमा पठाइएको छ भने किशोरको सरस्वतीनगर प्राथमिक स्वास्थ्य केन्द्र चनकट्टे जोरायलमा उपचार भईरहेको उनको भनाई छ।