स्वास्थ्य शिविरका नाममा ४ दिनसम्म खुलेयाम ठगी : वडा सरकार पनि ठगियो

दिपायल- दिपायल सिलगढी नगरपालिका वडा नं. ४ को कार्यालयले वैशाख २४ गते स्वास्थ्य शिविर सञ्चालन हुने सम्बन्धी सार्वजनिक सूचना प्रकाशन ग–यो । जसमा लेखिएको थियो पाँच सय रुपैयाँमा सम्पूर्ण शरीर (Whole Body) चेकजाँच गरिने भएकाले मौकाको फाइदा उठाउन अनुरोध गरिन्छ ।

वडा कार्यालयले सार्वजनिक गरेको सूचनामा (HIMS Health Care) काँडाघारी काठमाडौँको सहयोगमा डा. भूपेन्द्र क्षत्रीको टिमले स्वास्थ्य चेकजाँच गर्ने उल्लेख थियो । वडा कार्यालयले नै सूचना जारी गरेपछि सेवा लिने सर्वसाधारणहरुको घुँइचो लाग्यो । वैशाख २७ गतेबाट सुरु भएको उक्त शिविर ३० गतेसम्म सञ्चालन भयो ।

चार दिनसम्म सञ्चालन भएको उक्त शिविरमा दुई सय ३० जना बिरामीले आफ्नो स्वास्थ्य चेकजाँच गराए । चेकजाँचका क्रममा प्रतिव्यक्ति पाँच सयका दरले शुल्क लिइयो तर, भौचर, बिल दिइएन । स्वास्थ्य चेकजाँच गर्न आएका बिरामीहरुलाई प्रेसर, थाइराइड लगायतका समस्या देखिएको भन्दै चुम्बक जडित घडीको चेन जस्तो ब्रासलेट, कम्मर बाँध्ने बेल्ट लगायतका सामग्री पाँच हजारका दरले बिक्रि गरियो । Whole Body चेकजाँच गर्नका लागि क्वान्टम चुम्बकीय अनुनाद विश्लेषक (quantum magnetic resonance analyzer) नामक मेसिनको प्रयोग गरियो । नेपालमा स्वास्थ्य परीक्षणका लागि अनुमती नपाएको उक्त मेसिन प्रयोग गरेर जाप्निज प्रबिधिबाट शरिरमा भएको सम्पूर्ण रोग पत्ता लाग्ने भन्दै बिरामीहरुलाई ठगियो ।

यसरी ठगिए बिरामी

विशेषज्ञ डक्टरसहितको चिकित्सकको टोलीबाट स्वास्थ्य सेवा पाइने अपेक्षा बोकेर २ सय ३० जना बिरामीहरु ठगिएका छन् । पाँच सय रुपैयाँमा जिल्लामै नभएको सेवा (Whole Body) चेकअप हुने खबरले हर्षित भएका बिरामीले शिविर सकिए पछि आफुहरु ठगिएको जानकारी पाएका हुन् ।

सायल गाउँपालिकाबाट सस्तोमा पूर्ण शरीर परीक्षण हुने अपेक्षा बोकेर आएकी एक जना महिलालाई हातमा क्वान्टम चुम्बकीय अनुनाद विश्लेषकको सेन्सर समात्न लगाइन्छ । सेन्सर समातेको एक मिनेटमै उनको रिपोर्ट आउछ । रिपोर्ट आएपछि डा. भूपेन्द्र क्षेत्री भन्ने व्यक्तिले हरियो सागपात, फलफुल खान र मासु नखान परामर्श दिन्छन् । उनको रिपोर्टमा थाइराइड नर्मल देखिन्छ ।

त्यहाँ चित्त नबुझे पछि उनी नजिकैको सुजङ्ग अस्पतालमा थप उपचारका लागि जान्छिन् । सुजङ्ग अस्पतालको ल्याबमा परीक्षण गराउँदा उनमा थाइराइडको समस्या देखिन्छ र डक्टरले औषधी र परामर्श दिएर पठाउँछन् । शिविरमा नर्मल देखिएको थाइराड अस्पतालमा देखिन्छ ।

त्यस्तै दिपायल सिलगढी नगरपालिका वडा नं. ४ का कृष्ण कठायत पनि शिविरमा होल बडी चेक गर्छन । उनलाई पनि हरियो सागपात, फलफुल खान र मासु अल्कोहल नखान सुझाब दिइन्छ । पाँच सयमा होलबडी चेकअप भनेर ठगियो, “उनले भने,“सागपात, फलफुल खान र मासु अल्कोहल सेवन नगर्न भनियो । प्रेसरको समस्या छ, यो हातमा बाँध्नुस् भनेर ब्रासलेट दिइयो । पाँच हजार उक्त ब्रासलेटको लिइयो । हामी त ठगिएछौं । अब सम्बन्धीत निकायले कारबाही गरोस् ।”

क्षेत्रीले स्वास्थ्य चेकजाँच गर्ने सबै बिरामीहरुलाई एउटै खाले सुझाब दिएर पठाए । एक जना बिरामीलाई त कुकुरको मासु नखानु भनी रिपोर्टमा लेखिएको भेटियो । डक्टर भूपेन्द्र क्षेत्री लेखिएको रिपोर्टमा सुरुका दुई दिन हिन्दी र अंग्रेजी शब्द लेखिएको थियो । गुनासो बढेपछि नेपाली र अंग्रेजी बनाइएको थियो ।

वडा सरकार पनि ठगियो

बिरामीसँगै दिपायल सिलगढी नगरपालिकाको वडा सरकार पनि ठगिएको छ । वडा कार्यालयलाई विशेषज्ञ डक्टर आउने र पाँच सय रुपैयाँमा होलबडी चेकहुने खबर प्राप्त हुन्छ । त्यसपछि जनताले सहज स्वास्थ्य सेवा पाउने भए भनेर हौसिएको वडा सरकारले सूचना प्रकाशन गरेर प्रचार गर्छ ।

सेवा दिने डक्टर, संस्था र मेसिनको आधिकारिकता नै प्रमाणिकरण नगरेर वडा कार्यालय शिविरको आयोजक बनेको देखिन्छ । काउन्सिलबाट प्रमाणिकरण भएको विशेषज्ञ डक्टर आउने र दर्ता भएको संस्थाले सहयोग गर्ने जानकारी प्राप्त भएपछि आफुहरुले शिविर आयोजना गरेको वडाध्यक्ष अशोक सोपले बताए । उनले शिविरमा बिरामीहरु ठगिएको जानकारी नपाएको बताए ।

वडा कार्यालय आयोजक मात्र बनेन शिविरको व्यवस्थापनमा ४ दिनसम्म खटियो । वडाका कर्मचारी, स्वास्थ्यकर्मी पनि शिविरमा खटिएका थिए ।

स्वास्थ्य कार्यालय डोटीका प्रमुख रमेश मलासीले काउन्सिलमा दर्ता नभएका व्यक्तिहरुले शिविर सञ्चालन गर्न नपाउने बताए । सरकारका पाँच वटा आधिकारिक काउन्सिलहरु छन् जुनसुकै स्वास्थ्यकर्मीहरु पनि ति काउन्सिलमा आवद्ध हुनुपर्दछ । दर्ता नभएका व्यक्तिहरुले शिविर चलाउन त के बिरामी जाँच्न पनि पाउँदैनन्,“उहाँले भन्नु भयो,“यो शिविर कसरी सञ्चालन भयो जानकारी भएन ।”

को हुन् डक्टर भूपेन्द्र क्षेत्री भन्दै ठगी गर्ने व्यक्ति

डा. भूपेन्द्र क्षेत्री नाम बताउने भूपेन्द्र बहादुर क्षेत्री दार्चुलाका बासिन्दा हुन् । दार्चुला जिल्लाको साविकको खलंगा गाविस वडा नं. ५ मा उनको घर हो । उनीसँगको लामो फोन सम्पर्क पछि उनले आफ्नो परिचय खोलेका छन् ।

फोन सम्वादमा उनले आफु स्वास्थ्य क्षेत्रको डक्टर नभै पिएचडी होल्डर डक्टर भएको दावी गरेका छन् । उनीसँगै शिविरमा बिरामीको चेकजाँच गर्ने अर्का व्यक्ति पुस्कर गुनीयालले आफुहरुले चार÷पाँच वटा यस्तै शिविर चलाएको बताए । आफु डक्टरसँग जोडिएको थोरै समय भएको कारण डक्टरका विषयमा धेरै जानकारी नभएको बताउदै बाँकी कुरा उनैसँग सोध्न भने । वडा कार्यालयसँग आफुले समन्वय गरेर शिविर सञ्चालन भएको उनले बताए ।

डा. भूपेन्द्र क्षेत्री नाम बताउने ती व्यक्तिले आफु काउन्सिलमा दर्ता नभएको र स्वास्थ्य क्षेत्रको डक्टर नभएको स्वीकार गरेका छन् । होल बडी चेकजाँचका लागि र शिविर सञ्चालनका लागि कुनै पनि निकायको अनुमति नचाहिने उनको दावी छ ।

काठमाडौँको कागेश्वरी मनोहरा नगरपालिका वडा नं. ७ मा भूपेन्द्र बहादुर क्षेत्रीका नाममा मिति : २०८० पुस ११ गते व्यवसाय दर्ता भएको छ । उक्त वडामा होलिस्टिक इन्स्टिच्युट अफ मेडिकल सोलुसन्स, हिम्स हेल्थ केयर नामक व्यवसाय दर्ता छ । जसमा प्राकृतिक उपचार, थेरापी, दीर्घरोग उपचार तथा परामर्श सेवा गर्न पाउने उल्लेख छ । तर, शिविर सञ्चालन गर्ने कुरा कतै पनि उल्लेख छैन । व्यवसाय दर्ता प्रमाणपत्रमा व्यवसाय गर्दा अन्य निकायबाट अनुमति लिनुपर्ने भएमा अनुमति लिनुपर्ने जनाएको छ तर, अन्य निकायमा दर्ता भएको पाइदैन ।

शिखर समाचारले एउटा पुरानो भिडियो फेला पारेको छ । क्रिश्चियन धर्मको प्रचारका लागि बनाइएको उक्त भिडियोमा भनिएको छ,“म बासु भुपेन्द्र ब्याङ्लोर इन्डियाबाट ।”

यो हेर्नुहोस् भिडियो

के हो क्वान्टम चुम्बकीय अनुनाद विश्लेषक

क्वान्टम चुम्बकीय अनुनाद विश्लेषक (quantum magnetic resonance analyzer) एक प्रकारको मेसिन हो । कम्प्युटरमा सफ्टवेयरसँग यो मेसिन जडान गरिएको हुन्छ । हातले सेन्सर समातेर सफ्टवेयरमा सेट गरिएका १ देखि ५४ वटासम्म स्वास्थ्य डेटा अटोमेटिक प्रिन्ट हुन्छ । सेन्सर छोएको एक मिनेटमा पहिलै सेट गरिएका डेटा प्रिन्ट गरेर बिरामीलाई दिइन्छ ।

मानिसले प्रयोग गर्ने स्मार्ट घडी, मोबाइलमा राखिएका सफ्टवेयरले जसरी मुटुको गती, रगतको चाल पत्ता लगाउछ त्यसरी नै यो मसिनले काम गर्दछ । यसले सफ्टवेयरमा सेट गरिएका डेटाहरुको विश्लेषण गर्दछ । डा. भूपेन्द्र बताउने ब्यक्तिले मेसिन जाप्निज प्रबिधि युक्त भएको र सय प्रतिशत नै काम गर्ने दाबी गर्दै बिरामीलाई ठगी गरेका हुन् । तर, त्यो मसिनले भनेजस्तो काम नगर्ने र नेपालमा प्रयोगका लागि अनुमति नदिइएको चिकित्सकहरु बताउछन् ।

क्वान्टम चुम्बकीय अनुनाद विश्लेषक नामक यो मेसिन सर्वसाधारण जो कोहीले आफ्नो कम्प्युटरसँग जोडेर प्रयोग गर्न सक्दछन् । भारतीय बजारमा यसको मुल्य ५ हजार देखि माथि छ ।

यो भिडियो हेर्नु होस्