डोटीमा जीप दुर्घटना, चालक घाइते 

 

दिपायल – डोटीमा जीप दुर्घटना हुँदा एक जना घाइते भएका छन् । जिल्लाको आदर्श गाउँपालिका – २ भुण स्थित दिपायल – मेल्लेख सडक खण्डमा जीप दुर्घटना भएको हो ।

जिल्ला प्रहरी कार्यालय डोटीका अनुसार आइतबार बिहान २: ४५ बजेको समयमा दिपायलबाट मौवातर्फ जाँदै गरेको सुपप्र ०१००१ च ३७०१ नम्बरको बोलेरो जीप दुर्घटना भएको हो । दुर्घटनामा कञ्चनपुर जिल्लाको भीमदत्त नगरपालिका – १६ मझगाउँका ५० वर्षीय जीप चालक लक्ष्मी चाटौत घाइते भएका छन् ।

जीपमा अन्य यात्रु सवार नरहेको प्रहरीले जनाएको छ । घुम्तीमा जीप अनियन्त्रित भई सडकबाट १०० मीटर तल खोलामा खसेको छ।

घाइते चालकको शरीरको विभिन्न भागमा चोट लागेको छ। उनको राजपुर स्थित सुजङ्ग अस्पतालमा उपचार भइरहेको छ।