भारत लैजान लागिएकी बैतडीकी बालिकाको उद्धार

बैतडीबाट हराइरहेकी बालिकालाई भारत लैजाने क्रममा पर्साबाट उद्धार गरिएको छ । माघ ७ गतेदेखि बेपत्ता भएकी बालिका वीरगञ्ज महानगरपालिका १६ स्थित शंकराचार्य गेटबाट उद्धार गरिएको हो ।

बालिकालाई भारत लैजाने खोज्ने अर्घाखाँची सन्धिखर्क ७ घर भई हाल भरतपुर उपमहानगरपालिका १ बस्ने २८ वर्षीय राजु अधिकारी पक्राउ परेका छन्।

माइती नेपालको समन्वयमा बालिकालाई उद्धार गरिएको पर्सा प्रहरी प्रवक्ता प्रहरी नायब उपरीक्षक ओमप्रकाश खनालले बताए।

अधिकारी र बालिका एक महिनाअघिदेखि फोन सम्पर्कमा थिए। फोनबाटै चिनजान गरी बालिकालाई उनले भेट्न बोलाएका थिए।

अर्घाखाँची लगेर बिहे गर्छु भनी बालिकालाई वीरगञ्ज बसपार्कसम्म ल्याएको अनुसन्धानबाट खुलेको छ । बालिकालाई इनर्वा नाका हुँदै भारत लैजान खोजेको देखिन्छ।

बालिका अहिले माइती नेपालको साथमा छिन्। अधिकारीलाई मानव बेचबिखन तथा ओसारपसार मुद्दामा अनुसन्धान थालिएको छ।