नेपाल खनाललाई बस्नेतले भने,‘भागी विवाह गर्नु भएको छ । थर र गोत्रको पनि डर छ ?’

नेपालगञ्ज – नेकपाका नेता महेश बस्नेतले संसद पुनस्र्थापना भएमा देशमा अराजकता बढ्ने बताएका छन् ।

प्रेस संगठन, बाँकेले नेपालगञ्जमा आयोजना गरेको पत्रकार सम्मेलनमा बस्नेतले संसद पुनर्स्थापना भएमा देशमा अराजक र अपराधीकरण बढ्ने दाबी गरे । उनले माधव नेपाल र झलनाथ खनाललाई सूर्य चुनाव चिन्ह चाहिएमा मूलघरमा फर्किन आह्वान गरे ।

माधव नेपाल र झलनाथ खनाललाई लक्षित गर्दै नेता बस्नेतले थपे, ‘भागी विवाह गर्नु भएको छ । थर र गोत्रको डर पनि छ । माधव र झलनाथले हसिया हथौडा लिन सक्नु पर्छ । सूर्य चिन्ह चाहिएमा यतै आए हुन्छ ।’

नेता बस्नेतले एमालेको गुटबन्दीमा रमाएका साथीहरु प्रचण्डतिर लागेको आरोप लगाए । बस्नेतले गुटबन्दी रमाएहरुका संसद पुनस्र्थापना भइहालेमा प्रधानमन्त्री हुन पाइन्छ कि भन्ने आशा रहेको बताए ।

बस्नेतले प्रचण्ड–माधव समूहलाई पार्टीको माओवादी वा मालेमा नामाकरण गरेर अघि बढ्न सुझाव दिँदै भने, ‘पेरिसडाडामा एमालेले दाबी गर्दैन । तपाईँ हरु पनि बल्खुलगायत देशभरका एमालेले पसिना बगाएर बनाएका संरचनाहरुमा आँखा नलगाउनुस् । यदि हाम्रा सम्पतिमा आँखा लगाएमा देशभरका युवा विद्यार्थी चुप बस्दैनन् ।’