कैलाली प्रहरी हत्यामा संलग्न मुख्य योजनाकार शुकबहादुर पक्राउ

धनगढी- कैलालीको धनगढी उप–महानगरपालिका–१० जुगेडामा दुई जना प्रहरीको हत्या गर्ने समुहका मुख्य योजनाकार भनिएका शुकबहादुर भनिने ३४ बर्षे अमर रानालाई लाई प्रहरीले पक्राउ गरेको छ ।

जिल्ला प्रहरी कार्यालय कैलालीका प्रमुख प्रहरी उपरिक्षक अनुप शमसेर जबराका अनुसार पक्राउ परेका अमरबहादुरले नै घटना घटाउने योजना बनाई अन्य व्यक्तिलाई बोलाएका थिए ।

घटना लगत्तै फरार रहेको मुख्य योजनाकार भनिएका रानालाई जिल्ला प्रहरी कार्यालय र प्रदेश प्रहरी कार्यालयको संयुक्त अनुसन्धान टोलीले आइतबार वेलुका साढे ७ बजे पक्राउ गरेको प्रहरी प्रमुख जबराले बताए ।

कार्तिक १ गते नियमित गस्तीमा खटिएका बेला अस्थायी प्रहरी पोष्ट धनगढी जुगेडाका इन्चार्ज प्रहरी सहायक निरीक्षक गोविन्द बिक र प्रहरी जवान रामबहादुर साउद वेपत्ता भएका थिए ।

बिक कार्तिक २ गते नेपाल–भारत सीमा भएर बग्ने मोहना नदीमा विभत्स हत्या गरेको अवस्थामा भेटिएका थिए भने २ दिनपछि साउद पनि मोहना नदीमै हत्या गरेकै अवस्थामा फेला परेका थिए ।

प्रहरीले घटनामा संलग्न भएको भन्दै यस अघि ८ जनालाई पक्राउ गरी पुर्पक्षको लागि कारागार चलान गरेको छ ।