आईतबार सुदूरपश्चिमका थप ९० जनामा कोरोना पुष्टि

डोटी- सेती प्रादेशिक अस्पताल, डडेल्धुरा अस्पता र डोटी अस्पतालको प्रयोगशालामा गरिएको परिक्षणमा आइतबार सुदूरपश्चिमका थप ९० जनामा कोरोना संक्रमण पुष्टि भएको छ ।

सेतीमा ७७, डडेल्धुरामा १० र डोटीमा ३ जनामा कोरोना संक्रमण पुष्टि भएको अस्पतालद्वारा जारी विज्ञप्तिमा उल्लेख गरिएको छ ।

पछिल्लो २४ घण्टाको अवधिमा धनगढी स्थित सेती प्रादेशिक अस्पतालमा गरिएको ४ सय ६२ जनाको स्वाव परीक्षणमा कैलाली, कञ्चनपुर र बैतडीका गरी ७७ जनामा संक्रमण पुष्टि भएको अस्पतालले जनाएको छ ।

अस्पतालका सूचना अधिकारी दिलिपकुमार श्रेष्ठका अनुसार कैलालीको धनगढी उपमहानगरपालिकाका ३२ जना, लम्किचुहा नगरपालिकाका १० जना, टीकापुर नगरपालिकाका १० जना, गौरीगंगा नगरपालिका–१ का ४ जना, गोदावरी नगरपालिकाका ३ जना र भजनी नगरपालिका–५ का २ जनामा कोरोना संक्रमण पुष्टि भएको छ ।

त्यस्तै कञ्चनपुरको बेदकोट नगरपालिकाका ७ जना, पुर्नरवास नगरपालिका र भीमदत्त नगरपालिकाका ४÷४ जनामा संक्रमण पुष्टि हुँदा बैतडी सुर्नया गाउँपालिका–१ का एक जनामा संक्रमण पुष्टि भएको सूचना अधिकारी श्रेष्ठले बताए ।

यसै गरी आइतबार नै डोटी प्रयोगशालामा गरिएको १ सय १ स्वाव परिक्षणमा अछामको मंगलशेन नगरपालिकाका १ र डोटीको दिपायल सिलगढी नगरपालिकाका २ जनामा संक्रमण पुष्टि भएको अस्पतालका प्रयोगशाला इनचार्ज शौरभ श्रेष्ठले बताए ।

आइतबार नै डडेल्धुरा अस्पतालको प्रयोगशालामा गरिएको २ सय २४ जनाको स्वाव परिक्षणमा बैतडीको सिगास गाउँपाकिलाका २ र डोटीको जोरायल गाउँपालिकाका ८ गरी १० जनामा संक्रमण पुष्टि भएको अस्पतालका मेडिकल ल्याव टेक्नोलोजिस्ट जिनि गणेजुले बताए ।