कैलालीबाट एक महिला सहित ४ जना पक्राउ

धनगढी । कैलालीबाट लागू औषध सहित ४ जना पक्राउ परेका छन् । मंगलबार कैलालीको धनगढी र लम्की चुहाबाट लागू औषध सहित ४ जना पक्राउ परेका हुन । धनगढी उपमहानगरपालिका -२ त्रिनगर भन्सार कार्यालय नजिकबाट गोदावरी नगरपालिका ५ का १९ वर्षीय नवीन नेपाली समेत दुई जनालाई १३ ट्याब्लेट नाईट्राभेट र ४ क्याप्सुल स्पास नामक लागू औषध सहित पक्राउ गरिएको प्रदेश प्रहरी कार्यालय धनगढीले जनाएको छ । प्रहरीले उनले प्रयोग गरेको सुपप्र ०१०११ प ५३५१ नम्बरको मोटरसाइकल पनि नियन्त्रणमा लिएर अनुसन्धान गरिरहेको जनाएको छ ।

यस्तै धनगढी उपमहानगरपालिका (२ त्रिनगर भन्सार कार्यालय नजिकबाट धनगढी उपमहानगरपालिका (७ मनेहरा बस्ने २४ वर्षीय सन्दीप चौधरीलाई ८५० मिलिग्राम लागू औषध खैरो हेरोइन जस्तो देखिने धुलो पदार्थ सहित जिल्ला प्रहरी कार्यालय कैलालीबाट खटिएको प्रहरी टोलीले पक्राउ गरेको जनाएको छ ।

यसै गरी लागू औषध चरेस विक्री वितरण भइरहेको गोप्य सूचनाको आधारमा खटिएको प्रहरी टोलीले लम्की चुहा नगरपालिका ( १० चुहाबाट ५० वर्षीय कमला रावतलाई पक्राउ गरेको छ । उनले सञ्चालन गरेको पसलमा खानतलासी गर्दा ७०० ग्राम लागू औषध चरेस जस्तो देखिने कालो पदार्थ इलाका प्रहरी कार्यालय लम्कीबाट खटिएको प्रहरी टोलीले नियन्त्रणमा लिएको प्रदेश प्रहरी कार्यालय धनगढीले जनाएको छ ।