कैलाली– सुदूरपश्चिममा आफ्नो सत्ता बनाउँन प्रदेशको सबैभन्दा ठूलो दल नेपाली कांग्रेस नागरिक उन्मुक्ति पार्टी(नाउपा)लाई मुख्यमन्त्री दिन लचिलो देखिएको छ ।
सत्ता गठबन्धनले सुदूरपश्चिम सरकारको नेतृत्व एमाले र माओवादीले आधाआधा समय गर्ने भागबन्डा मिलाएपछि कांग्रेसले निर्णायक शक्ति नाउपालाई फकाउँने कसरत तीव्र पारेको हो ।
काँग्रेसका नेताहरुले काठमाडौं डिल्लीबजार कारागारमा रहेका पार्टीका संरक्षक रेशम चौधरीलाई समेत भेटेका छन् । भेटका क्रममा सुदूरपश्चिम प्रदेशको मुख्यमन्त्री नै नाउपालाई दिनसकिने विषयमा छलफल भएको कांग्रेसका एक नेताले बताए ।
‘मुख्यमन्त्री नाउपालाई दिने विषयमा पनि कुरा छलफल भएको छ । हामी त्यसमा लचिलो छौं,’ कांग्रेसका नेताले भने, ‘अन्य पदका विषयमा समग्रमा टुंगो लागोस् भनेर छलफल जारी छ । सम्भवतः भोलिसम्म ठोस निष्कर्ष निस्कन्छ ।’
सुदूरपश्चिम प्रदेश सरकार बनाउँन २७ सदस्य आवश्यक पर्छ । जसमा काग्रेसका मात्रै १९ सदस्य छन् । नाउपाका ७ मिलाएर २६ सदस्य पुग्छ । त्यसबाहेक स्वतन्त्र र राप्रपामध्ये एउटा सांसद मिसाउँन सकिने विश्वास कांग्रेसको छ ।
नागरिक उन्मुक्ति पार्टीले भने सुदूरपश्चिम सरकारमा पार्टीको सहभागिताबारे निर्णय गर्न २४ घण्टाको समय मागेको छ ।
सुदूरपश्चिममा सरकार गठनमा निर्णायक बनेको नागरिक उन्मुक्तिले भने मुख्यमन्त्री दाबी गर्दै आएको थियो । नागरिक उन्मुक्ति पार्टीका नेता गंगराम चौधरीले सोमबार साँझसम्म निर्णय गरिने बताए ।
‘प्रदेश सरकारको हकमा के गर्ने भन्ने निर्णय गर्न हामीले २४ घण्टाको समय मागेका छौं । आज साँझसम्ममा एउटा टुंगोमा पुग्छौं,’ उनले भने, ‘झुटा मुद्दा फिर्ता लिने, लाल आयोगको प्रतिवेदन सार्वजनिक गर्ने र रेमश चौधरीको रिहाइका लागि पहल गर्ने भरपर्दो प्रतिबद्धता आयो भने हामी सरकारमा जान सक्छौं । साँझसम्म के हुन्छ हेरौं ।’
प्रदेश प्रमुख देवराज जोशीले पुस २७ गते साँझ ५ बजेभित्र मुख्यमन्त्रीको दाबी पेश गर्न आह्वान गरेसँगै प्रदेश सरकार गठनको प्रयासले तीव्रता पाएको छ ।
दिपायल – “प्रथम रनिङ्ग मेयर कप पुरुष भलिबल प्रतियोगिता २०८१”...