डोटी कांग्रेसले अस्थायी कोभिड अस्पताल स्थापनाका लागि पार्टी कार्यालय दिने

डोटी– नेपाली कांग्रेस डोटीली अस्थायी कोभिड अस्पताल सञ्चालनका लागि पार्टी कार्यालय दिने निर्णय गरेको छ । जिल्लामा कोरोनाका बिरामीहरु बढ्दै गएको अवस्थामा अस्थायी अस्पतालको आवस्यकता परेमा पार्टी कार्यालयको हल उपलब्ध गराउने निर्णय गरेको हो ।

जिल्लामा भयावह अवस्था आएमा, बिरामीले अस्पतालहरु भरिएमा अस्थायी कोरोना अस्पताल सञ्चालन गर्नका लागि पार्टी कार्यालयको हल उपलब्ध गराउने नेपाली कांग्रेस डोटी सभापति प्रदिप कुमार देउवाले बताए । उनले जिल्ला अस्पतालले स्रोत साधन जुटाएर चिकित्सक सहित आवस्यक परेको समयमा पार्टी कार्यालयमा अस्थायी अस्पताल सञ्चालन गर्न सक्ने बताए ।

जिल्ला प्रशासन कार्यालयमा सरोकारवालासँग भएको छलफलमा अस्थायी अस्पतालका लागि पार्टी कार्यालय प्रयोग गर्न सकिने जनाएको क्षेत्रीय सभापती एबं शिखर नगरपालिकाका नगर प्रमुख सिताराम जोशीले बताए । उनले त्यहाँ अस्पताल सञ्चालन गर्नका लागि शिखर नगरपालिकाका तर्फबाट १० वटा बेड समेत उपलब्ध गराउने बताए ।

शिखर नगरपालिकाले बाहिरी जिल्लाको शव व्यवस्थापनका लागि घाट र दाउरा समेत उपलब्ध गराउने जनाएको छ । साथै नगरले कोरोना संक्रमितको उपचारका लागि जिल्ला अस्पताललाई एक लाख रुपैया उपलब्ध गराउने नगर प्रमुख जोशीले बताए ।