नेपालमा कोराेनाविरुद्धको खोप माघ १४ गतेदेखि लगाइने

प्रधानमन्त्रीले खोप अभियानको शुभारम्भ गर्ने

नेपाल सरकारले कोरोना भाइरसविरुद्वको भ्याक्सिन अभियान आगामी १४ माघबाट गर्ने भएको छ । यो अभियानको उद्घाटन प्रधानमन्त्री केपी शर्मा ओलीले गर्ने भएका छन् । 

प्रधानमन्त्री ओलीले अभियानको शुभारम्भ १४ माघ बिहान १० बजे गर्ने जनाइएको छ । खोप अभियान देशभर एकैपटक सुरु गर्ने स्वास्थ्य तथा जनसंख्या मन्त्रालयले जनाएको छ । सम्भव नभएका स्थानमा पनि १८ माघभित्रै खोप लगाइनेछ । 

यसैबीच स्वास्थ्य मन्त्रालयले आज (आइतबार) देशभरका सबै सात प्रदेशमा खोप पुऱ्याइसक्ने जनाएको छ । सुरुमा फ्रन्टलाइनरमा रहेर काम गर्ने व्यक्तिहरूलाई खोप दिने नेपाल सरकारको योजना छ । यसका लागि भारत सरकारले १० लाख डोज खोप नेपाललाई अनुदानमा दिएको छ । 

अक्सफोर्ड÷एस्ट्राजेनेकाले विकास गरेको तथा सेरम इन्स्टिच्युट अफ इन्डियाले उत्पादन गरेको ‘कोभिसिल्ड’ खोपका एक लाख भायल भारतले अनुदानमा दिएको छ । गत बिहीबार खोप काठमाडौं आइपुगेको थियो । एक भायलमा १० डोज खोप हुन्छ । खोप टेकुस्थित स्वास्थ्य सेवा विभागको केन्द्रीय खोप भण्डारणगृहमा राखिएको छ ।