फोटो खिच्न र टिकटक बनाउन धनगढीमा ‘अम्ब्रेला स्ट्रिट’

कैलाली- अहिले चितवन र काठमाडौँमा ‘अम्ब्रेला स्ट्रिट’ चर्चा हुन्छ । सजाएर राखिएको छातामुनी बसेर रमाइलो गर्ने युवापुस्तादेखि बृद्धबृद्धाको संख्या उल्लेख्य हुन्छ । ति ठाउँहरुमा फोटो खिच्न र टिकटक बनाउनेहरुको सबैभन्दा बढि भीड हुने गरेको छ । अब सुदूरपश्चिमको राजधानी धनगढीमा पनि सजाएर राखिएको छातामुनी बसेर फोटो खिच्न र टिकटक बनाउन र्पाइने भएको छ । कोरोना कहरले झण्डै १० महिनासम्म बन्द रहेर सोमवारदेखि सञ्चालनमा आएको धनगढीको एसटिएस सिनेमाले ‘अम्ब्रेला स्ट्रिट’ तयार पार्न लागेको हो । एसटिएस सिनेमा झण्डै डेढ सय रंगीचंगी छाता आकाशमा झुन्डाउन लागिएको छ । 

टिकटक बनाउन, फोटो सेसन गर्न र सेल्फी खिच्नका लागि ‘अम्ब्रेला स्ट्रिट’ तयार पार्न लागिएको एसटिएस सिनेमाले जनाएको छ । ‘अम्ब्रेला स्ट्रिट’ आज साँझसम्म तयार हुनेछ । काठमाडौं, चितवनमा प्रयोग गरेको कन्सेप्टले जति चर्चा पायो उति नै धनगढीले पनि चर्चा पाउने विश्वास गरिएको छ । यस्तै एसटिएस सिनेमाले विभिन्न प्रतियोगिता प्रत्येक्ष हेर्नका लागि प्राङगणमा ७५ इन्चको एलईडी टिभी पनि जडान गरेको छ । अहिले एसटिएस सिनेमा आमा र सेन्टी भाईरस फिल्म प्रदर्शन भईरहेको छ ।